ნარკოპოლიტიკისა კანონმდებლობის სრულყოფის მიზნით, პარლამენტის თავმჯდომარის მოადგილის, გიორგი წერეთლის ინიციატივით, პარლამენტში ნარკოპოლიტიკის პრობლემები განიხილეს და საერთაშორისო ექსპერტების რეკომენდაციები მოისმინეს.
წერეთლის განმარტებით, საქართველოს კანონმდებლობა გაეროსა და ევროკავშირის შეთანხმებებისა და მიმართულებების შესაბამისი უნდა იყოს.
"ის უნდა შემუშავდეს საერთაშორისო გამოცდილებებზე დაყრდნობით და საქართველოს სპეციფიკის გათვალისწინებით. რამდენიმე დღის წინ ჩატარდა ქართულ-ამერიკული კონფერენცია, რომელსაც USAID -ის წარმომადგენლები ესწრებოდნენ. შევთანხმდით, რომ გარდა სხვა სტრატეგიული მიმართულებებისა, ამერიკის შეერთებული შტატები პარტნიორობას გაგვიწევს ნარკოპოლიტიკის შემუშავების სფეროშიც", -განაცხადა წერეთელმა.
მისი თქმით, აღნიშნული მიმართულებით ქართული საზოგადოება სერიოზულ გადაწყვეტილებებს ელოდება.
USAID -ის წარმომადგენლის, ერიკ კარლინის განმარტებით, ქართულ კანონმდებლობაში ნარკომომხმარებელთა მიმართ მკაცრი სადამსჯელო სანქციებია დაწესებული.
"მთავარია გვესმოდეს, რომ ნარკოტიკების გამოყენება არის ჯანმრთელობის პრობლემა. ნარკომანია დაავადებაა, ხოლო ნარკომომხმარებლები ფსიქო-ფიზიკური თვალსაზრისით უმწეო ადამიანები არიან. გაერო აქცენტს აკეთებს მათ უფლებებზედაც", - განაცხადა ერიკ კარლინმა.
მისი თქმით, უნდა გაიზარდოს ხელმისაწვდომობა ნებაყოფლობით მკურნალობასა და ოპიოდებით ჩანაცვლების თერაპიაზე.
"ნარკოპოლიტიკა უნდა განთავსდეს ჯანმრთელობის, უსაფრთხოების განვითარების და სამართლიანობის გზაჯვარედინზე", - აღნიშნა USAID -ის წარმომადგენელმა