საპარლამენტო უმრავლესობა "თავისუფალი დემოკრატების" მოთხოვნას გრძელვადიან პაემნებზე უარის თქმის შემთხვევაში, პატიმრისთვის გასაჩივრების უფლების მიცემის შესახებ არ იზიარებს.
საპარლამენტო უმრავლესობის პოზიციით, პატიმარს ისედაც აქვს შესაძლებლობა, მისთვის უარის უკანონოდ თქმის შემთხვევაში გადაწყვეტილება პროკურატურაში გაასაჩივროს და "ადმინისტრაციის კრიმინალი ხელმძღვანელი" სათანადოდ დაისაჯოს. შესაბამისად, ხელისუფლებას ამ მიმართულებით კანონში დამატებითი ჩანაწერის გაკეთება უსაფუძვლოდ მიაჩნია.
"თავისუფალი დემოკრატების" პოზიციით კი, მოქმედი პატიმრობის კოდექსის 95-ე მუხლის მე-6 ნაწილის თანახმად, პატიმრის მოთხოვნაზე უარი გასაჩივრებას არ ექვემდებარება. გრძელვადიანი პაემანი ადმინისტრაციისადმი მოთხოვნის წარდგენით ინიშნება. ადმინისტრაციას კი შეუძლია უარი განაცხადოს პაემნის მიცემაზე, თუკი არსებობს "უარის თქმის მოტივირებული საფუძველი".
"ჩვენ ჯერ კიდევ 2010 წლის სექტემბერში ავღნიშნეთ, რომ ეს დებულება წინააღმდეგობაშია ევროპული კონვენციის მე-13 მუხლთან. ახალი ცვლილებების შეტანის შედეგად კი, ეს წინააღმდეგობა კიდევ უფრო თვალსაჩინო ხდება და მე-13 მუხლთან ერთობლიობაში არღვევს კონვენციის მე-8 მუხლსაც (პირადი და ოჯახური ცხოვრების დაცულობის უფლება), ვინაიდან მხოლოდ ადმინისტრაციის შეფასებაზეა დამოკიდებული, არსებობს თუ არა "უარის თქმის მოტივირებული საფუძველი", - აღნიშნა ცაგარეიშვილმა.