აშშ-ის პრეზიდენტმა დონალდ ტრამპმა ჩინეთში ვიზიტის შემდეგ ტაივანს დამოუკიდებლობის გამოცხადებისგან თავის შეკავება ურჩია. ამასთან, თეთრი სახლის ლიდერმა არ გასცა მკაფიო პასუხი კითხვაზე, მოაწერს თუ არა ხელს ტაივანისთვის დიდი ხნის განმავლობაში გადადებულ ამერიკული იარაღის მიწოდების პაკეტს.
ამის შესახებ ტრამმა Fox News-თან ინტერვიუში ისაუბრა.
ინტერვიუში ტრამპმა დეტალურად ისაუბრა ჩინეთის პრეზიდენტ სი ძინპინთან გამართულ მოლაპარაკებებზე და იმაზე, თუ რა გავლენა შეიძლება ჰქონდეს მათ გლობალურ უსაფრთხოებაზე. შეკითხვაზე ეუძლია თუ არა ტაივანის მოსახლეობას თავი უსაფრთხოდ იგრძნონ ტრამპისა და სი-ს შეხვედრების შემდეგ, ტრამპმა უპასუხა:
„არაფერი შეცვლილა. ასე ვიტყვი: არ მინდა, რომ ვინმე დამოუკიდებელი გახდეს. და იცით, ჩვენ მოგვიწევს 9 500 მილის გავლა, რომ ვიომოთ. მე ეს არ მინდა. მინდა, რომ ისინი დამშვიდდნენ. მინდა, რომ ჩინეთი დამშვიდდეს“.
ჩინეთის საგარეო საქმეთა სამინისტროს განცხადებით, სი ძინპინმა ასევე გააჟღერა გაფრთხილებები ტაივანთან დაკავშირებით და აღნიშნა, რომ მომავალში შესაძლოა წარმოიშვას „შეტაკებები და კონფლიქტებიც კი“ აშშ-სა და ჩინეთს შორის ამ კუნძულის გამო.
ტრამპმა ასევე თავი შეიკავა მკაფიო პასუხისგან კითხვაზე, მოაწერს თუ არა ხელს ტაივანისთვის განკუთვნილ 14 მილიარდი დოლარის ღირებულების ამერიკული იარაღის პაკეტს, მიუხედავად იმისა, რომ კონგრესმა გასულ წელს, ეს პაკეტი წინასწარ დაამტკიცა, თეთრმა სახლმა მისი დამტკიცება შეაჩერა.
