ჩრდილოატლანტიკური ალიანსი ელოდება, რუსული სამხედრო მანქანის შემდგომ გაძლიერებას, – ამის შესახებ ნატო-ს სამხედრო კომიტეტის თავმჯდომარემ, ადმირალმა ჯუზეპე კავო დრაგონემ უკრაინულ მედიასთან ინტერვიუში განაცხადა.
"ჩვენ მკაფიოდ უნდა გვესმოდეს, რა გველის მომავალში. ველოდებით რუსული სამხედრო მანქანის შემდგომ გაძლიერებას. ამას დავუპირისპირდებით ჩვენი შესაძლებლობების განვითარებით - ყველაფრით, რისი შეძენაც ახლო და გრძელვადიან პერსპექტივაში გვაქვს დაგეგმილი.. ეს პირდაპირ არის დაკავშირებული საფრთხეების ხასიათთან. ნატოსთვის საფრთხეს წარმოადგენს, რა თქმა უნდა, რუსეთი და ტერორისტული დაჯგუფებები. ჩვენ ორივე მიმართულებით ვმუშაობთ, რათა წინმსწრებად ვიმოქმედოთ", - განაცხადა ჯუზეპე კავო დრაგონემ.
შეკითხვაზე ამ ეტაპზე ჩანს თუ არა რუსეთის მხრიდან ევროპის ქვეყნების მიმართ რაიმე მოკლევადიანი ან საშუალოვადიანი უშუალო საფრთხეები, ადმირალმა აღნიშნა, რომ ჰიბრიდული და არატრადიციული საფრთხეები უკვე არსებობს და მომავალშიც გაგრძელდება.
"შეიძლება ვივარაუდოთ, რომ რუსეთი შეეცდება დაიბრუნოს ის, რასაც ადრე ფლობდა", - განაცხადა ჯუზეპე კავო დრაგონემ.
დამაზუსტებელ შეკითხვაზე მან განმარტა:
"მე ვგულისხმობ პერიოდს სსრკ-ის დაშლამდე. ასე რომ, თქვენ თვითონ შეგიძლიათ განსაჯოთ, ვინ შეიძლება გახდეს სამიზნე".
მისივე თქმით, ამ შემთხვევაში მხოლოდ ბალტიის ქვეუნები არ მოიაზრება.
"არა მხოლოდ ისინი. მაგრამ ჩვენ ორიენტირებულები ვართ თვითდაცვაზე, შეკავებაზე და 360-გრადუსიან დაცვაზე. ჩვენ ვიმყოფებით არქტიკაში, აღმოსავლეთში და ყურადღებით ვაკვირდებით სიტუაციას სამხრეთშიც", - განაცხადა ჯუზეპე კავო დრაგონემ .
