უკრაინა აქტიურად აფართოებს საერთაშორისო თანამშრომლობას თავდაცვის ინდუსტრიაში და შეიარაღების ექსპორტის მიმართულებით, განსაკუთრებით უპილოტო საფრენი აპარატების სფეროში. უკვე გაფორმებულია რამდენიმე სტრატეგიული, გრძელვადიანი შეთანხმება ახლო აღმოსავლეთის ქვეყნებთან. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
„ჩვენ უკვე შევთანხმდით 10-წლიან ხელშეკრულებებზე სამ მთავარ ქვეყანასთან — საუდის არაბეთთან, არაბთა გაერთიანებულ საამიროებთან და კატართან. და ეს მხოლოდ დასაწყისია, რადგან ასეთი თანამშრომლობის მოთხოვნა უკვე მივიღეთ 11 სახელმწიფოსგან — ახლო აღმოსავლეთისა და ყურის რეგიონიდან, და ეტაპობრივად ვაკვირდებით თანამშრომლობის შესაძლებლობებს კავკასიაშიც,“ — განაცხადა უკრაინის პრეზიდენტმა.
მან აღნიშნა, რომ საუბარია არა მხოლოდ მიწოდებაზე, არამედ სრულფასოვან პარტნიორობაზე წარმოებისა და ტექნოლოგიების განვითარებაში.
„ე.წ. Drone Deal-ის ფარგლებში იქნება სულ მცირე 10 სხვადასხვა შეთანხმება, რომლებიც ითვალისწინებს უკრაინული იარაღის ექსპორტს სხვადასხვა ფორმატით. საუბარია ასევე წარმოებაზე — ჩვენი საწარმოო ხაზების შექმნაზე როგორც უკრაინაში, ისე სხვა ქვეყნებში. ასევე ვსაუბრობთ ახალ ტექნოლოგიებზე, რომლებიც პარტნიორებთან ერთად იქმნება და მათ მიერ ფინანსდება. გარდა ამისა, უკვე არსებობს ერთწლიანი დაფინანსების შეთანხმებები შესაბამისი წარმოებისთვის და განსაზღვრულია თანამშრომლობის ვადები რამდენიმე წლით წინ,“ — თქვა მან.
ზელენსკიმ ასევე ხაზი გაუსვა ევროპულ ქვეყნებთან თანამშრომლობის გააქტიურება.
„მეორე მნიშვნელოვანი მიმართულება ევროპაა. ჩვენ უკვე დავიწყეთ მუშაობა გერმანიასთან, იტალიასთან, ნორვეგიასთან, შვედეთთან და ნიდერლანდებთან. რა თქმა უნდა, გვაქვს ძლიერი ურთიერთობები დიდ ბრიტანეთთან და საფრანგეთთან და დარწმუნებული ვარ, ეს თანამშრომლობა კიდევ უფრო გაძლიერდება,“ — აღნიშნა მან.
