უნგრეთის საპარლამენტო არჩევნებში გამარჯვებული პარტია „ტისას“ ლიდერი პეტერ მადიარი ევროკომისიის წარმომადგენლებთან ტექნიკური შეხვედრების შემდეგ აცხადებს, რომ მისი მთავრობა ითანამშრომლებს ბრიუსელთან, უნგრეთისთვის გაყინული სახსრების განბლოკისთვის.
ამის შესახებ მან პლატფორმა X-ზე დაწერა.
ევროკომისიის წარმომადგენლებსა და უნგრეთის არჩევნებში გამარჯვებული პარტიის გუნდს შორის პირველი ტექნიკური შეხვედრები ბუდაპეშტში 17–18 აპრილს გაიმართა.
პეტერ მადიარმა ამ შეხვედრებს „უკიდურესად მნიშვნელოვანი“ უწოდა და პრემიერ-მინისტრის თანამდებობაზე თავისი პირველი ნაბიჯები დააანონსა.
მადიარმა ასევე განაცხადა, რომ მისი მთავრობის ერთ-ერთი მთავარი ამოცანა იქნება ევროკავშირის მიერ უნგრეთისთვის შეჩერებული თანხების განბლოკვა.
"ბოლო ორი დღის განმავლობაში ბუდაპეშტში გავმართეთ მაღალი დონის მოლაპარაკებები ევროკომისიის ლიდერებთან.
ამ მოლაპარაკებების ფარგლებში მკაფიოდ განვაცხადე, რომ პარტია „ტისას“ მთავრობა იწყებს მუშაობას უპრეცედენტო ლეგიტიმაციით და ამავდროულად მაღალი პასუხისმგებლობით. ხაზგასმით აღვნიშნე, რომ უნგრეთის ხალხის გადაწყვეტილება წარმოადგენს უზარმაზარ შესაძლებლობას როგორც უნგრეთისთვის, ისე ევროპისთვის.
მე მკაფიოდ განვაცხადე, რომ ევროკავშირის მილიარდობით ევრო სრულად ეკუთვნის უნგრეთსა და უნგრელ ხალხს. ამ თანხების გარეშე შეუძლებელი იქნება უნგრეთის ეკონომიკის ამოქმედება. ევროკავშირის დაფინანსება არ არის ქველმოქმედება — ეს არის სამართლიანი ანაზღაურება უნგრელების მიერ ევროკავშირში შეტანილი წვლილისა და იმ სამუშაოსთვის, რომელიც უნგრეთმა ევროპისთვის შეასრულა.
მოლაპარაკებების დასაწყისში პარტნიორებს გავაცანი პარტია „ტისას“ ვალდებულებები უნგრელი ხალხის მიმართ: ანტიკორუფციული ზომები, უნგრეთის მიერთება ევროპის პროკურატურასთან და სასამართლო სისტემის, მედიისა და უმაღლესი განათლების დამოუკიდებლობის აღდგენა.
მთავრობის ფორმირების შემდეგ, ჩვენ ვაპირებთ ამ ვალდებულებების სრულად შესრულებას, ისევე როგორც შევასრულებთ დაპირებას, რომ უნგრელი ხალხისთვის კუთვნილი ევროკავშირის თანხა ქვეყანაში დავაბრუნოთ.
შემდგომში გაგრძელდა ახალი ტექნიკური მოლაპარაკებები, რომელშიც მონაწილეობდნენ მომავალი უნგრეთის მთავრობის მაღალი დონის წარმომადგენლები. ეს იყო კრიტიკულად მნიშვნელოვანი საუბრები — პირველი ნაბიჯები რთულ, მაგრამ აუცილებელ პროცესში.
არსებობს სრული შეთანხმება ერთ საკითხზე: რეალური მუშაობა უნდა დაიწყოს, რათა ევროკავშირის კუთვნილი თანხა საბოლოოდ გაიხსნას უნგრეთისთვის.
წინა მთავრობის შეცდომების შედეგები ერთ ღამეში არ გაქრება. მაგრამ ჩვენ არ ვეძებთ გამართლებებს — ჩვენ ვეძებთ გადაწყვეტილებებს. პირველი ნაბიჯები უკვე გადავდგით სწორი მიმართულებით.
გეგმის მიხედვით, პრემიერ-მინისტრის ფიცის დადების შემდეგ ჩემი მესამე ვიზიტი იქნება ბრიუსელში, სადაც ევროკავშირის ინსტიტუტებთან და წევრი ქვეყნების ლიდერებთან შევათანხმებთ ყოვლისმომცველ შეთანხმებას, რათა უნგრეთის ხალხმა და ბიზნესმა რაც შეიძლება სწრაფად მიიღოს მათთვის განკუთვნილი ევროკავშირის დაფინანსება.
12 აპრილს უნგრელმა ხალხმა მკაფიო და გადამწყვეტი არჩევანი გააკეთა: უნგრეთის ადგილი არის ევროპაში", - წერს მადიარი.
ამასთან, ევროკომისიაში განაცხადეს, რომ ბუდაპეშტში შეხვედრებზე ასევე განიხილებოდა უკრაინისთვის 90 მილიარდი ევროს კრედიტის განბლოკვის საკითხი.
