ჩეხეთის პრემიერ-მინისტრმა ანდრეი ბაბიშმა ნატო-ს გენერალურ მდივან მარკ რუტესთან შეხვედრისას განაცხადა, რომ პრაღა მუშაობს თავისი თავდაცვითი ვალდებულებების შესრულებაზე.
როგორც ჩეხური მედია წერს. ჩეხეთის მთავრობა კრიტიკის ქვეშ მოექცა იმის გამო, რომ მიმდინარე წლის ბიუჯეტში თავდაცვაზე გამოყოფილი თანხა მშპ-ის (GDP) 2%-ზე ნაკლებია. ნატო-ს 2025 წლის ჰააგის სამიტზე მოკავშირეები შეთანხმდნენ, რომ მიზანი 5%-მდე გაზრდა იქნებოდა.
ბაბიშმა რუტეს უთხრა, რომ მისი მთავრობა ქვეყნის თავდაცვასა და ნატო-ს ვალდებულებებს პრიორიტეტად მიიჩნევს. მისი თქმით, ჩეხეთის მთავრობასა და ალიანსის წარმომადგენლებს განსხვავებული მონაცემები აქვთ ხარჯებისა და მათი წილის შესახებ მშპ-ში, ამიტომ ისინი გეგმავენ ამ ინფორმაციის გაცვლას და განხილვას ანკარაში ივლისში დაგეგმილ სამიტამდე.
„მნიშვნელოვანია, რომ ვიცოდეთ ერთმანეთის მოლოდინები და შესაძლებლობები“, — განაცხადა ბაბიშმა.
პრემიერმა ასევე აღნიშნა, რომ ბოლო წლებში ჩეხეთის თავდაცვითი ხარჯები ოთხჯერ გაიზარდა ქვეყნის ეკონომიკური ზრდის გამო, თუმცა ეს პროცენტულად შესაძლოა არ ჩანს.
„მესმის, რომ წესები მშპ-ის პროცენტებზეა დაფუძნებული. ერთხელ ეს ავუხსენი პრეზიდენტ ტრამპს ნატო-ში - ყველას განსხვავებული მშპ გვაქვს. მაგრამ ყველაფერს გავაკეთებთ, რომ ჩვენი ვალდებულებები შევასრულოთ“, - თქვა მან.
ნატო-ს გენერალურმა მდივანმა განაცხადა, რომ ჩეხეთი ალიანსის სანდო წევრია და მზად არის საერთო თავდაცვაში წვლილის შესატანად. მან ასევე აღნიშნა, რომ ნატო-მ გასულ წელს უსაფრთხოების მდგომარეობის გამო თავდაცვის ხარჯების 5%-მდე გაზრდა გადაწყვიტა.
„თავდაცვის ხარჯების გაზრდა აუცილებელია იმისთვის, რომ გვქონდეს ძალები, რესურსები და შესაძლებლობები ჩვენი მოქალაქეების დასაცავად. ჩვენ ვიცით — და ეს ეხება ყველა მოკავშირეს, რომ ბიუჯეტთან დაკავშირებული გადაწყვეტილებების მიღება და თავდაცვის ხარჯების გაზრდა მარტივი არ არის. თუმცა, საბოლოო ჯამში, უსაფრთხოება არის კეთილდღეობის საფუძველი“, — განაცხადა მან.
