გერმანიის კანცლერმა ფრიდრიხ მერცმა განაცხადა, რომ აშშ-ის პრეზიდენტ დონალდ ტრამპთან სატელეფონო საუბრისას, სხვა საკითხებთან ერთად, ჩრდილოატლანტიკური ალიანსის მომავალიც განიხილეს. ამის შესახებ Welt იუწყება.
მისი თქმით, საუბრის დროს არ განხილულა გერმანიიდან ამერიკის ჯარების გაყვანა ან სამხედრო ინფრასტრუქტურის გამოყენების შეზღუდვა, თუმცა ლიდერებმა ნატო-ს მომავალზე ისაუბრეს.
„ჩვენი სატელეფონო საუბრის დროს მე მას შევთავაზე, რომ ნატო-ს მომავალი ანკარაში ნატო-ს სამიტამდე, რომელიც ივლისის დასაწყისში გაიმართება, კიდევ ერთხელ განვიხილოთ. ეს ალიანსი არანაირად არ შეიძლება შეიცვალოს და ამიტომ მე ძალიან დაინტერესებული ვარ მისი შენარჩუნებით და შემდგომი განვითარებით ამერიკის პრეზიდენტთან ერთად“, - თქვა მერცმა.
მან ხაზგასმით აღნიშნა, რომ არ სურს, აშშ-სა და ირანს შორის ომმა კიდევ უფრო გაართულოს ურთიერთობები შეერთებულ შტატებსა და მის ევროპელ ნატოელ პარტნიორებს შორის.
„ჩვენ არ გვინდა - მე არ მინდა - ნატო-ს დაშლა. ნატო ჩვენი უსაფრთხოების გარანტია, კერძოდ, უპირველესად ევროპაში,“ - Reuters-ის ცნობით, განაცხადა მერცმა.
