ხვალ, 16 თებერვალს, საქართველოში საფრანგეთის ელჩი ერიკ ფურნიე რამდენიმე ადამიანს "აკადემიური პალმის რტოთი" დააჯილდოებს.
როგორც "ჯი-ეიჩ-ენს" საფრანგეთის საელჩოდან აცნობეს, საფრანგეთის სახელმწიფო ჯილდო გადაეცემათ სიბილა გელაძეს (თბილისის ივანე ჯავახიშვილის სახელობის სახელმწიფო უნივერსიტეტის ჰუმანიტარული ფაკულტეტის რომანისტიკის მიმართულების ასოცირებული პროფესორი; ფრანგული ენის ექსპერტი ეროვნული გამოცდებისა და შეფასების ცენტრში; მთარგმნელი, 2009 წელს პრემია "გალას" მფლობელი საუკეთესო თარგმანისთვის) ირინა ტუხულოვას (თბილისის ილიას სახელობის სახელმწიფო უნივერსიტეტის ენების ცენტრის ფრანგული ენის მასწავლებელი, ფრანგული ენის სწავლების ახალი მეთოდების და სახელმძღვანელოების ავტორი) ვაჟა ცხოვრებაშვილს (თბილისის ივანე ჯავახიშვილის სახელობის სახელმწიფო უნივერსიტეტის ზუსტი და საბუნებისმეტყველო მეცნიერებათა ფაკულტეტის სასწავლო პროცესის სამსახურის უფროსი, ქიმიის დოქტორი; მარი ბროსეს სახელობის ფრანგულ-ქართული სკოლის დირექტორი), ქეთევან ჯაშს (თბილისის ილიას სახელობის სახელმწიფო უნივერსიტეტის მეცნიერებებისა და ხელოვნების ფაკულტეტის სრული პროფესორი რომანისტიკაში, ფილოლოგიის მეცნიერებათა დოქტორი, სორბონის უნივერსიტეტის (პარი 4)àლინგვისტური კვლევითი ჯგუფის წევრი, მთარგმნელი-თარჯიმანი) და მზაღო დოხტურიშვილს (თბილისის ილიას სახელობის სახელმწიფო უნივერსიტეტის მეცნიერებებისა და ხელოვნების ფაკულტეტის სრული პროფესორი რომანისტიკაში, ილიას სახელობის სახელმწიფო უნივერსიტეტის სამეცნიერო კვლევითი ცენტრის "რომანული ურთიერთგაგება. ინტერტექსტუალური დიალოგი" დირექტორი; ფრანკოფონული კვლევების საერთაშორისო საბჭოს და ფილოლოგიურ და ჰუმანიტარულ მეცნიერებათა ფაკულტეტების საერთაშორისო ასოციაციის აღმასრულებელ კომიტეტში ცენტრალური და აღმოსავლეთ ევროპის წარმომადგენელი).
"აკადემიური პალმის რტოს" ორდენით განათლების სფეროში მოღვაწე სამოქალაქო პირები და უცხოელები ჯილდოვდებიან, რომლებსაც განსაკუთრებული დამსახურება მიუძღვით ფრანგული ენისა და კულტურის გავრცელებაში.
ორდენი სამი ხარისხისაა: რაინდის, ოფიცრისა და კომანდორის.
