"ბაზალეთის ტბის კომპლექსის" ტერიტორიაზე ძაღლების ხოცვა ჩვეულებრივ მოვლენად იქცა, ისევე, როგორც სანადირო თოფით შეიარაღებული პირის გადაადგილება.
კომპლექსში მომუშავე ერთ-ერთი პირი, ენდერ ხულელიძე, სისტემატურად ახორციელებს ძაღლებზე ძალადობას. ამას ადასტურებს "ჯი-ეიჩ-ენის" მიერ მოპოვებული მტკიცებულებები და ფაქტები.
მსგავსი შემთხვევა ბოლოს 13 თებერვალს განხორციელდა. ენდერ ხულელიძემ მორიგი "ნადავლი" ერთი გასროლით ვერ მოკლა და დაჭრილი ძაღლი მეორე გასროლით "ჩააძაღლა".
13 თებერვალს ბაზალეთზე მომხდარი ფაქტი პირველი შემთხვევა არაა. შესაბამისად, შეუძლებელია, ხულელიძე აღნიშნულ ვადალურ საქციელს "ბაზალეთის ტბის კომპლექსის" ხელმძღვანელობის მითითების გარეშე სჩადიოდეს. ასევე შეუძლებელია, ხელმძღვანელობის ნებართვის გარეშე სანადირო თოფით შეიარაღებული კომპლექსის ტერიტორიაზე გადაადგილდებოდეს. მით უფრო, რომ "თოფიანი კაცი" ბაზალეთის ტერიტორიაზე დღესაც (15 თებერვალს) გადაადგილდებოდა, რაც შეუძლებელია არ შეენიშნა იქ მყოფ 40-მდე სტუმარს და ადგილობრივ პერსონალს.
აღნიშნულ ფაქტთან დაკავშირებით "ჯი-ეიჩ-ენი" დაუკავშირდა "ბაზალეთის ტბის კომპლექსის" ხელმძღვანელს, ტარიელ დოლიშვილს.
დოლიშვილი ადასტურებს, რომ ენდერ ხულელიძე მის დაწესებულებაში მუშაობს, თუმცა ამბობს, რომ კომპლექსის ტერიტორიაზე ფაუნის წარმომადგენლებზე ძალადობის არანაირი მცდელობა არ ყოფილა.
რა თქმა უნდა, ტარიელ დოლიშვილთან დაკავშირების გადაწყვეტილების მიღებისას ჩვენთვის ნათელი იყო, რომ კომპლექსის ხელმძღვანელი აღნიშნულ ფაქტთან რაიმე კავშირს უარყოფდა. თუმცა შესაბამისი მტკიცებულებების გარეშე აღნიშნული თემისთვის ხელი ჩვენც "არ მოგვიკიდია".
სავარაუდოდ, დოლიშვილსთვის ბოლომდე არაა ცნობილი, რომ საქართველოს სისხლის სამართლის კოდექსის 259-ე მუხლის თანახმად, ცხოველისადმი სასტიკი მოპყრობა, რამაც მისი დაღუპვა ან დასახიჩრება გამოიწვია, აგრეთვე ცხოველის წვალება, ისჯება ჯარიმით ან გამასწორებელი სამუშაოთი ვადით ერთ წლამდე. იგივე ქმედება, ჩადენილი ჯგუფურად; არაერთგზის; მცირეწლოვნის თანდასწრებით, ისჯება ჯარიმით ან თავისუფლების აღკვეთით ვადით ორ წლამდე. თუმცა აღნიშნული უკვე სამართალდამცავების კომპეტენციას წარმოადგენს.
დუშეთის მუნიციპალიტეტის პოლიციის უფროს ვახტანგ დიდიძის განცხადებით, აღნიშნულ ფაქტთან დაკავშირებით ადგილობრივ სამართალდამცავ სტრუქტურაში არანაირი ინფორმაცია არ შესულა.
"ბაზალეთის ტბის კოპლექსი დახურული ტერიტორიაა. ვადასტურებ, რომ ენდერ ხულელიძე იქ მუშაობს, თუმცა მსგავსი რამ, რომ ის იარაღგადაკიდებული დადის ან ცხოველებს ხოცავს, არ გსვმენია", - აცხადებს "ჯი-ეიჩ-ენთან" საუბარში ვახტანგ დიდიძე.
აღნიშნული თემის კომენტირებისას არასამთავრობო ორგანიზაციის "ცხოველთა უფლებების კომიტეტის" ხელმძღვანელმა თინა ჭავჭანიძემ "ჯი-ეიჩ-ენს" განუცხადა, რომ მსგავსი ფაქტი კანონდარღვევაა და ცხოველთა უფლებათა დაცვის ფარგლებს და კანონს ყველანაირად სცილდება.
"აღნიშნული სახის ქმედებები ისჯება კანონით. როდესაც ხულელიძე აღნიშნული სახის ქმედებას სჩადიოდა, თვითმხილველს აუცილებლად უნდა დაერეკა პატრულისთვის, რათა შესაბამისი რეაგირება მომხდარიყო დანაშაულზე. ცხოველთა მოკვლა უფლებათა დაცვის ყველანაირ ფარგლებს სცდება. ცხოველისადმი სასტიკი მოპყრობა, წვალება ან მათი მოკვლა კანონდარღვევაა და შესაბამისი რეაგირება უნდა მოჰყვეს", - განაცხადა თინა ჭავჭანიძემ.
მისი თქმით, როდესაც ხორციელდება ცხოველების უკანონო ხოცვა, საზოგადოებამ, ცალკეულმა ინდივიდმა უნდა აცნობოს შესაბამის უწყებებს, რომელიც მსგავს ფაქტებზე რეაგირებას მოახდენს.
ჭავჭანიძე განმარტავს, რომ არსებობს სპეციალური დაწესებულებები, რომლებიც დაავადებულ ცხოველთა ევთანაზიას, რელაქსაციის გზით და ჰუმანურად ახორციელებენ.
"როდესაც ხდება ძალადობა ცხოველებზე, არაა გამორიცხული, რომ მოძალადემ ადამიანების მისამართითაც გაილაშქროს და ეს პირველ რიგში საფრთხეს უქმნის საზოგადოებას", - განმარტავს თინა ჭავჭანიძე.
დაბოლოს, როდესაც ასეთ ფაქტს ადგილი აქვს ქვეყნისთვის მეტად მნიშვნელოვან ტურისტულ კომპლექსში, სადაც როგორც ჩვენი თანამემამულეები, ასევე უცხოელები ისვენებენ, პირველ რიგში, რეპუტაცია ქვეყანას ელახება.
სავარაუდოდ, ბაზალეთის კომპლექსის მესვეურები თავიანთი "საგმირო საქმეების" შესახებ ინფორმაციებს ინვესტორებს არ აწვდიან, თორემ სათუოა, რომ ინვესტორმა მათ საქციელი მოუწონოს, მით უფრო ისეთი, რომელიც უკანონო და ანტიჰუმანურია.