საქართველოს საპატრიარქო გავრცელებულ ინფორმაციას იმის თაობაზე, რომ გიორგობის დღესასწაულთან დაკავშირებით პატიმართა შეწყალება საპატრიარქოს შუამდგომლობის საფუძველზე მოხდა, კატეგორიულად უარყოფს.
"ვრცელდება ინფორმაცია, თითქოს ნოემბრის თვეში (გიორგობის დღესასწაულისთვის) შეწყალებულ პატიმართა უმრავლესობა საპატრიარქოს მიერ იყო წარდგენილი, რაც რეალობას არ შეესაბამება. შეწყალების პროცედურების განხორციელებამდე ხელისუფლების მხრიდან გვაცნობეს, რომ საპატრიარქოს სიებიდან გაათავისუფლებდნენ ნაკლებად მძიმე დანაშაულის მქონე მხოლოდ 50 პატიმარს და აქედან გამომდინარე, მოთხოვნაც შესაბამისად ამდენ პიროვნებაზე უნდა გაგვეკეთებინა. 50-ის ნაცვლად საპატრიარქომ 152 პატიმრის სია გაუგზავნა იუსტიციის სამინისტროს. აქედან 29 პატიმარი გაათავისუფლეს, 9-ს სასჯელი გაუნახევრეს, ხოლო ერთი წელი ჩამოაკლეს 4 პატიმარს. ასე, რომ გათავისუფლებაც და შეღავათებიც შეეხო მხოლოდ 42 ადამიანს", - ნათქვამია საპატრიარქოს განცხადებაში.
აქვე აღნიშნულია, რომ საპატრიარქოსთვის გაუგებარია "რა პრინციპით შეირჩა ეს პიროვნებები".
"შევნიშნავთ იმასაც, რომ სამწუხაროდ, გათავისუფლებულ პატიმართა რაოდენობა თანდათან მცირდება", - აღნიშნულია განცხადებაში.
