სერბეთის პრეზიდენტი ალექსანდარ ვუჩიჩი მიიჩნევს, რომ აშშ ირანს მომდევნო 48 საათში დაარტყამს. ამის შესახებ მან TV Pink-ის ეთერში განაცხადა.
სერბეთის პრეზიდენტის თქმით, მსოფლიო უკიდურესად სახიფათო მომენტშია. მისივე განმარტებით, უმოკლეს დროში დიდ სამხედრო და პოლიტიკურ არეულობებს ელოდება.
ვუჩიჩმა აღნიშნა, რომ აშშ, შეუძლია ირანზე თავს დაესხას, რათა, ჯეფრი ეპშტეინის საქმეში არსებული ახალი დოკუმენტებიდან ყურადღება გადაიტანოს.
მან დასძინა, რომ ეს არ არის მომავალი ამერიკული დარტყმის მთავარი მიზეზი, მაგრამ ეს ფაქტორი დააჩქარებს თეთრ სახლში გადაწყვეტილების მიღებას.
„როდესაც ასეთი აბსურდია, მაგალითად, რაც მონიკა ლევინსკის (რომელიც ცნობილია აშშ-ის 42-ე პრეზიდენტ ბილ კლინტონთან სკანდალური რომანით) შემთხვევაში მოხდა, მაშინ ვიღაცა დაბომბვას იწყებს. არ მჯერა, რომ ეს იქნება მიზეზი, მაგრამ თითქმის დარწმუნებული ვარ, რომ ეს დააჩქარებს ზოგიერთი გადაწყვეტილების მიღებას“, - განაცხადა სერბეთის პრეზიდენტმა.
შეგახსენებთ, 28 იანვარს აშშ-ის პრეზიდენტმა დონალდ ტრამპმა განაცხადა, რომ ირანისკენ უზარმაზარი არმადა მიემართება და ირანს მოუწოდა სწრაფად დაჯდეს მოლაპარაკებების მაგიდასთან და გააფორმოს სამართლიანი შეთანხმება - ბირთვული იარაღის გარეშე.
„იმედია, ირანი სწრაფად დაჯდება მოლაპარაკებების მაგიდასთან და მოლაპარაკებას დაიწყებს სამართლიან და თანასწორ შეთანხმებაზე - ბირთვული იარაღის გარეშე - ისეთზე, რომელიც ყველა მხარისთვის კარგი იქნება. დრო იწურება, ეს ნამდვილად არსებითია! როგორც ერთხელ უკვე ვუთხარი ირანს, დადეთ შეთანხმება! მათ ეს არ გააკეთეს და იყო „ოპერაცია „შუაღამის ჩაქუჩი“, ირანის მასშტაბური განადგურება. შემდეგი თავდასხმა გაცილებით უარესი იქნება! არ დაუშვათ, რომ ეს ისევ მოხდეს“,-აღნიშნა ტრამპმა.
