მალე საქართველოში პირველი ქართული კომპიუტერული წარმოება ამუშავდება და კომპიუტერული გიგანტის, "ინტელის" ლიცენზიის მქონე ქართული ქარხანა გაიხსნება. ეს განცხადება საქართველოს პრეზიდენტმა მიხეილ სააკაშვილმა პარლამენტში ყოველწლიური მოხსენების დროს სიტყვით გამოსვლისას გააკეთა.
"ჩვენი ქვეყნის ეკონომიკური წარმატების ერთ-ერთი კომპონენტი უნდა იყოს მაღალტექნოლოგიური წარმოების განვითარება. ამას ალტერნატივა არ აქვს. მომავალი 6 წლის განმავლობაში საქართველო უნდა ვაქციოთ ახალი ტექნოლოგიების ახალი წარმოების რეგიონალურ ცენტრად. სულ მალე საქართველოში ამუშავდება პირველი ქართული კომპიუტერული წარმოება. ახალ ქართულ კომპიუტერულ ქარხანას ექნება მსოფლიო კომპიუტერული გიგანტის "ინტელის" ლიცენზია და ქართული ბრენდის ქვეშ "დამზადებულია საქართველოში" განახორციელებს მაღალტექნოლოგიური კომპიუტერული ნაწარმის გამოშვებას - დაწყებული პერსონალური კომპიუტერებიდან, დამთავრებული ლეპტოპებითა და ნეტბუკებით", _ აცხადებს საქართველოს პრეზიდენტი.
მისი თქმით, ქარხანაში იმუშავებენ ქართველი სპეციალისტები. საქართველო იქნება ევროპაში მესამე ქვეყანა, სადაც "ინტელის" ქარხანა გაიხსნება.
"ჩვენ გვყავს ძალიან ძლიერი პროგრამისტები, რომლებსაც მსოფლიო სტანდარტების კომპიუტერული პროგრამების უზრუნველყოფის წარმოება შეუძლიათ. ჩვენ დავიწყეთ პირველკლასელებისთვის კომპიუტერების დარიგება და ვინ რა არ ილაპარაკა, რომ ბავშვებს მხედველობა დააკლდებათ, ბავშვები დაჩლუნგდებიან, ხერხემალი გაეღუნებათ და დაინვალიდდებიან. ეს არის, რა თქმა უნდა, სისულელე და მტკნარი სიცრუე. მალე ჩვენი ბავშვები მსოფლიოს ახალ ბილ გეიტსებად და სტივ ჯობსებად შეიძლება იქცნენ", _ განაცხადა სააკაშვილმა.
