გუშინ ღამით რუსებმა უკრაინაზე კიდევ ერთი თავდასხმა განახორციელეს, 370 დრონი და სხვადასხვა ტიპის 21 რაკეტა გაუშვეს. მტრის თავდასხმის ქვეშ მოექცა კიევი და მიმდებარე რეგიონი, ასევე სუმის, ხარკოვისა და ჩერნიჰივის ოლქები. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
როგორც პრეზიდენტმა აღნიშნა, ხარკოვში დაზიანდა სამშობიარო სახლი, იძულებით გადაადგილებულ პირთა საერთო საცხოვრებელი, სამედიცინო კოლეჯი და საცხოვრებელი შენობები. ცნობილია, რომ ათობით ადამიანი დაშავდა, მათ შორის ერთი ბავშვი.
კიევსა და მიმდებარე რეგიონში რუსების მთავარი სამიზნე ენერგეტიკის სექტორი იყო. დაიღუპა ერთი ადამიანი.
პრეზიდენტმა ასევე ხაზი გაუსვა საჰაერო თავდაცვის სისტემების მიწოდების მნიშვნელობას, რათა უკრაინამ შეძლოს ამ თავდასხმებზე რეაგირება.
„ყველა ჩვენი პარტნიორის რეაგირებისა და დახმარების იმედი გვაქვს. Patriot-ის, NASAMS-სა და ყველა სხვა სისტემის თითოეული რაკეტა კრიტიკული ინფრასტრუქტურის დაცვას და ადამიანებს ზამთრის სიცივის გადატანაში დაეხმარება.
ყველაფერი, რაზეც დავოსში პრეზიდენტ ტრამპთან შევთანხმდით საჰაერო თავდაცვის საკითხთან დაკავშირებით“, - აღნიშნა პრეზიდენტმა.
შეგახსენებთ, ვოლოდიმირ ზელენსკიმ გუშინ განაცხადა, რომ დავოსში დონალდ ტრამპს Patriot-ის სისტემებისთვის ახალი რაკეტების მიწოდებაზე შეუთანხმდა.
