"ქრისტიან-დემოკრატები" ისრაელის მიერ საქართველოს სახიფათო ქვეყნების სიაში შეყვანას ისრაელელ ბიზნესმენების საქმეს უკავშირებენ.
ამის შესახებ ჟურნალისტებს "ქრისტიან-დემოკრატიული" ფრაქციის თავმჯდომარემ გიორგი ახვლედიანმა განუცხადა.
"ოფიციალური მიზეზი, როგორიც არის ტერორისტული საფრთხეები - ეს შეიძლება ცოტა ფასადური მიზეზი იყოს. შეიძლება ვივარაუდოთ, რომ ჩვენ ერთ-ერთი მეგობარი და პარტნიორი სახელმწიფოს ისრაელის შიშები და მოლოდინები საქართველოს მიმართ იმ რეალობიდან გამომდინარეობს, რომელიც ხელისუფლებამ ებრაელ ბიზნესმენებთან დაკავშირებით შეიქმნა, როცა ისინი ციხეში ჩასვა. რასთან დაკავშირებითაც მთელი მსოფლიოს ბიზნეს საზოგადოება და ცივილიზებული სამყარო ობიექტურ აღშფოთებას გამოთქვამს", - აღნიშნა ახვლედიანმა.
მისივე შეფასებით, საქართველოს დღევანდელი ხელისუფლება შეიძლება მომავალშიც ბევრი პრობლემის შემქმნელი გახდეს, თუ პოლიტიკას 180 გრადუსით არ შეცვლის.
"პოლიტიკა უნდა შეცვალოს, როგორც ქვეყნის შიგნით მყოფ ბიზნესმენებთან, ასევე უცხოელებთან და ჩვეულებრივი ადამიანების უფლებების დარღევასთან დაკავშირებით. წინააღმდეგ შემთხვევაში ეს შეიძლება გახდეს საერთაშორისო დონეზე კიდევ უფრო მეტი პრობლემების შემქმნელი", - აღნიშნა დეპუტატმა.
შეგახსენებთ, ისრაელმა საქართველო სახიფათო ქვეყნების სიაში შეიყვანა.
ტერორიზმთან ბრძოლის სახელმწიფო შტაბის ინფორმაციით, ისრაელის მოქალაქეებისთვის განსაკუთრებულ საფრთხეს წარმოადგენენ ეგვიპტე, თურქეთი, აზერბაიჯანი, საქართველო, სომხეთი, კოტ-დივუარი, მალი, მავრიტანია და ვენესუელა და უსაფრთხოების სამსახურები ისრაელის მოქალაქეებს ამ ქვეყნებში სტუმრობისაგან თავის შეკავებას ურჩევენ.
