არ მაძლევენ უფლებას, შევხვდე ჩემს მეუღლეს პენიტენციურ დაწესებულებაში, როგორც მისი ადვოკატი, - ბაჩო ახალაიას მეუღლე, ანი ნადარეიშვილი სოციალურ ქსელში წერს.
ის საქართველოს პროკურატურას მიმართავს განცხადებით, განუმარტონ, რატომ არ ეძლევა უფლება ახალია ადვოკატის სტატუსით მოინახულოს.
ნადარეიშვილი აქვეყნებს გენერალური პროკურორის გიორგი გვარაკიძის მისამართით დაწერილი შესაბამისი განცხადების ტექსტს.
"2025 წლის 25 დეკემბერს მე და ჩემი მეუღლე ბაჩო ახალაია ჩვენს საცხოვრებელ ბინაში დაგვაკავეს საქართველოს სს კოდექსის 225-ე მუხლის I ნაწილით. მე გათავისუფლებული ვიქენი რამდენიმე საათში, ჩემს მიმართ სისხლის სამართლის დევნის დაწყებისა და ბრალის წაყენების გარეშე. ამჟამად ჩემს მიმართ არ მიმდინარეობს არც ერთი სისხლის სამართლებრივი საქმე და არ გამაჩნია ბრალდებულის ან ეჭვმიტანილის სტატუსი.
მიუხედავად ზემოაღნიშნულისა, არ მაძლევენ უფლებას, შევხვდე ჩემს მეუღლეს პენიტენციურ დაწესებულებაში, როგორც მისი ადვოკატი. ზეპირი განმარტებით მითხრეს, რომ ჩემი "სამართლებრივი სტატუსი გაურკვეველია", თუმცა ამ დრომდე არ მომეწოდა არც ერთი წერილობითი გადაწყვეტილება ან სამართლებრივი დასაბუთება," - წერს ნადარეიშვილი განცხადებაში, რომლითაც პროკურატურას, სახალხო დამცველსა და ადვოკატთა ასოციაციას მიმართავს.
