გამოქვეყნებიდან 24 საათზე ნაკლებ დროში, აშშ-ის იუსტიციის დეპარტამენტის ვებგვერდიდან ჯეფრი ეპშტეინთან დაკავშირებული სულ მცირე 16 ფაილი, მათ შორის აშშ-ის პრეზიდენტ დონალდ ტრამპთან დაკავშირებული ფოტოები, გაქრა. ამის შესახებ The Associated Press წერს.
გამოცემა აღნიშნავს, რომ მთავრობამ საზოგადოებას ამ საკითხთან დაკავშირებით არანაირი განმარტება ან ინფორმაცია არ მიაწოდა.
AP წერს, რომ დაკარგული ფაილები, რომლებიც პარასკევს იყო ხელმისაწვდომი, მაგრამ შაბათს გაქრა, შიშველი ქალების გამოსახულებებს შეიცავდა.
მათ შორის ასევე იყო ტრამპის ფოტოები ეპშტეინთან, მელანია ტრამპთან და ეპშტეინის პარტნიორ, გისლენ მაქსველთან ერთად.
იუსტიციის დეპარტამენტმა არ დააკონკრეტა, თუ რატომ წაიშალა ფაილები ან იყო თუ არა ეს განზრახ წაშლილი.
ფაილების აუხსნელმა გაუჩინარებამ გამოიწვია სპეკულაციები იმის შესახებ, თუ რა წაიშალა ზუსტად და რატომ არ გახდა საზოგადოებისთვის ცნობილი ის, რამაც ეპშტეინისა და მის გარშემო მყოფი გავლენიანი ფიგურების გარშემო ხანგრძლივი ინტრიგები გამოიწვია.
„კიდევ რას მალავენ? ამერიკელ საზოგადოებას აქვს გამჭვირვალობის უფლება“, - დაწერეს სოციალურ ქსელ X -ში გამოქვეყნებულ პოსტში წარმომადგენელთა პალატის ზედამხედველობის კომიტეტის დემოკრატმა წარმომადგენლებმა ტრამპის გაუჩინარებულ ფოტოსთან დაკავშირებით.
ამ ეპიზოდმა გაამწვავა შეშფოთება, რომელიც ისედაც გაჩნდა იუსტიციის დეპარტამენტის მიერ დოკუმენტების გამოქვეყნების შემდეგ.
„გამოქვეყნებულ ათიათასობით გვერდს არ მოჰყოლია რაიმე ახალი ინფორმაცია ეპშტეინის დანაშაულების ან პროკურატურის გადაწყვეტილებების შესახებ, რამაც მას წლების განმავლობაში სერიოზული ფედერალური ბრალდებების თავიდან აცილების საშუალება მისცა და გამოტოვებული იყო ზოგიერთი ყველაზე საინტერესო მასალა, მათ შორის FBI-ის მსხვერპლთა ინტერვიუები და იუსტიციის დეპარტამენტის შიდა დოკუმენტები ბრალდებების გადაწყვეტილებებთან დაკავშირებით,“ - აღნიშნავს გამოცემა.
The Associated Press წერს, რომ დოკუმენტებში, რომლებიც კონგრესის მიერ ცოტა ხნის წინ მიღებული კანონის თანახმად გამოქვეყნდა, თითქმის არ არის ნახსენები ეპშტეინთან დიდი ხნის კავშირების მქონე რამდენიმე გავლენიანი ადამიანი, მათ შორის ბრიტანეთის ყოფილი პრინცი ენდრიუ, რაც კითხვის ნიშნის ქვეშ აყენებს იმას, თუ რამდენად უწყობს ხელს ეს გამოქვეყნება საჯარო ანგარიშვალდებულებას.
გამოცემა წერს, რომ ფაილებს შორის იყო ყოფილი პრეზიდენტის ბილ კლინტონის აქამდე გამოუქვეყნებელი ფოტოების სერია, თუმცა ტრამპის ძალიან მცირე რაოდენობით ფოტო. ისინი ეპშტეინთან იყვნენ დაკავშირებული, თუმცა შემდეგ ორივემ უარყო ეს მეგობრობა. არცერთი მათგანისთვის ბრალი არ წაუყენებიათ ეპშტეინთან დაკავშირებული რაიმე დანაშაულისთვის და არ არსებობდა არანაირი მინიშნება იმისა, რომ ფოტოებს რაიმე როლი ჰქონდათ მის წინააღმდეგ აღძრულ სისხლის სამართლის საქმეებში.
შეგახსენებთ, აშშ-ის იუსტიციის დეპარტამენტმა 19 დეკემბერს გამოაქვეყნა დოკუმენტი, რომელიც ათასობით გვერდს მოიცავს, ფინანსისტ ჯეფრი ეპშტეინის საქმიდან, რომელიც პედოფილიაში იყო ბრალდებული, თუმცა მრავალ ცნობილ და გავლენიან ადამიანთან ინარჩუნებდა ურთიერთობებს.
ეპშტეინის ფაილების გამჭვირვალობის შესახებ კანონი აშშ-ის კონგრესმა თითქმის ერთხმად 19 ნოემბერს მიიღო, იუსტიციის დეპარტამენტს მასალების გამოსაქვეყნებლად 30 დღე მიეცა.
ფინანსისტ ჯეფრი ეპშტეინს სექსუალური ტრეფიკინგისთვის ბრალი 2019 წელს წაუყენეს. ბრალის თანახმად, მან ათობით არასრულწლოვანი გოგო სექსუალურ ტრეფიკინგში ჩართო. ეპშტეინი ციხეში გარდაიცვალა, ოფიციალური ინფორმაციით, მან სიცოცხლე სუიციდით დაასრულა. სექსუალური ტრეფიკინგის ბრალდებით დააკავეს ასევე ეპშტეინის პარტნიორი ქალი გილეინ მაქსველი, რომელსაც 20 წლით თავისუფლების აღკვეთა მიუსაჯეს.
გასულ წელს გამოქვეყნებულ ეპშტეინის საქმის სასამართლო დოკუმენტებში დასახელებული იყო რამდენიმე ცნობილი სახელი, რომლებსაც ბრალდებულთან ჰქონდათ კავშირი. ერთ-ერთ დოკუმენტში ფიგურირებს დონალდ ტრამპის სახელიც, თუმცა მის მართლსაწინააღმდეგო ქმედებებზე საუბარი არ არის. ცნობილია, რომ წლების წინ დონალდ ტრამპს ურთიერთობა ჰქონდა ჯეფრი ეპშტეინთან, რომელიც ფინანსისტად მუშაობდა ნიუ იორკსა და ფლორიდაში.
