აჭარა ტურისტების მოსაზიდად საკუთარ სტრატეგიას ცვლის და აქცენტს დაბალფასიან და გაყიდვად ტურისტული პაკეტების შემუშავებაზე აკეთებს. "აჭარის ტურიზმის სააგენტოს" ხელმძღვანელის, სოფო ნიკოლაიშვილის განმარტებით, აჭარის მთავრობის პრიორიტეტია, რომ თითოეული პაკეტი იყოს მაქსიმალურად იაფი და თითოეულ სამიზნე ბაზარზე მორგებული.
"აჭარის ტურისტულმა სააგენტომ" უკვე გააფორმა ხელშეკრულება სასტუმროებსა და სხვადასხვა განთავსების საშუალებებთან და შესაძლებლობა გვაქვს ტურისტებს ამ მიმართულებით 20 %-მდე ფასდაკლებით მოვემსახუროთ. გვაქვს ასევე საკმაოდ იაფიანი ექსკურსიები, რადგანაც ჩვენთვის მთავარია პროდუქტი იყოს იაფი და გაყიდვადი"- განაცხადა ნიკოლაიშვილმა.
"აჭარის ტურისტულმა სააგენტოს" ხელმძღვანელი აცხადებს, რომ უკვე შემუშავებულია რამდენიმე ტურისტული პაკეტი, მათ შორის არსებობს სპეციალური პაკეტი ეკო ტურიზმის მიმართულებითაც.
"ამ დროისთვის გვაქვს 3 დღიანი და 6 დღიანი "ეკო ტურები". ტურისტული პაკეტის ღირებულება ჯგუფის შემადგენლობაზეა დამოკიდებული. მაგალითად თუ ჯგუფის შემადგენლობაში 10 ადამიანია, მაშინ ჯგუფის თითოეული წევრის ტურისტული პაკეტის საფასური, 6 დღიანი პაკეტის შემთხვევაში 310 დოლარია",- განაცხადა "აჭარის ტურისტულმა სააგენტოს" ხელმძღვანელმა სოფო ნიკოლაიშვილმა.
აღსანიშნავია, რომ ძალაშია ასევე "ვიიქნედ ტურები", რომელიც 2010 წლის განმავლობაში საკმაოდ პოპულარულობით სარგებლობდა. 10 კაციანი ჯგუფის ფარგლებში "ვიიკენდ ტურის" ღირებულება 97 დოლარია.
უკვე მზადაა ასევე "სოფლის ტურების" პაკეტიც, რომლითაც ძირითადად ბალტიისპირეთის ქვეყნები არიან დაინტერესებულნი. 10 კაციანი ტურის ფარგლებში "სოფლის ტურის" ღირებულება თითო ადამიანზე 223 დოლარი ღირს.
შეგახსენებთ, რომ აჭარის მთავრობის ინფორმაციით, 2011-2014 წლებში ყველაფერი უნდა გაკეთდეს იმისათვის, რომ რეგიონში სერვისის დონე ამაღლდეს და ინფრასტრუქტურის გაუმჯობესდეს.
საშუალოვადიან პერიოდში დაგეგმილია ასევე, ადგილობრივი ტურისტული ინდუსტრიის სუბიექტებისათვის ხელშეწყობა და სტიმულირება სახელმწიფო დაკვეთების, მოთხოვნის სტიმულირებისა და სხვა ირიბი მეთოდებით. 2011-2014 წლებში აჭარის ტურიზმის დეპარტამენტის მთავარ პრიორიტეტად ითვლება ასევე შიდა და რეგიონალურ ბაზრებზე მარკეტინგული სარეკლამო საქმიანობის კონცენტრირება.
აჭარის ტურიზმის დეპარტამენტის ინფორმაციით, მსოფლიო ეკონომიკური კრიზისის პირობებში ტურისტული სეზონისათვის მზადება ახალი რისკებისა და გამოწვევების გადალახვას გულისხმობს. ექსპერტების შეფასებით ამ პირობებში მოსალოდნელია ძვირადღირებული ტურების ხვედრითი წილის შემცირება, მთელს მსოფლიოში ბიზნეს აქტივობის შესუსტებასთან ერთად მოსალოდნელია ასევე ბიზნეს ტურების შემცირებაც, ნაკლებად მიმზიდველი იქნება ტურისტებისთვის ისეთი ტურებიც, სადაც მაღალია მგზავრობის ხარჯების ხვედრითი წილი. ამ პირობებში მოსალოდნელია, რომ გაიზრდება შიდა ტურიზმისა და რეგიონალური ტურიზმის ხვედრითი წილი.
დეპარტამენტში განმარტავენ, რომ 2010 წელს დაფინანსდა მაღალმთიან აჭარაში სამთო სათხილამურო კურორტის მშენებლობის საპროექტო სამუშაოები, რაც იქნება მყარი საფუძველი შემდგომი საინვესტიციო მოქმედებების განსახორციელებლად და ინვესტორების მოსაზიდად.
