უკრაინის პრეზიდენტი ვოლოდიმირ ზელენსკი საბერძნეთში ოფიციალური ვიზიტით ჩავიდა.
ზელენსკიმ მანამდე განაცხადა, რომ საბერძნეთთან უკრაინისთვის გაზის მიწოდების შესახებ შეთანხმება მომზადდა.
"დღეს უკრაინისა და უკრაინელი ხალხისთვის დიდი გამოწვევაა - ეს ზამთარი რუსული დრონების, რაკეტებისა და ყოველდღიური თავდასხმების ფონზე... ძალიან მოხარული ვარ, რომ ბოლო რამდენიმე თვის განმავლობაში ვმუშაობდით უკრაინისთვის ენერგეტიკული მხარდაჭერის შესახებ ორმხრივ შეთანხმებებზე. და დღეს, ვფიქრობ, ჩვენ უკრაინისთვის ენერგეტიკული უსაფრთხოების ამ მნიშვნელოვან შეთანხმებებს განვახორციელებთ“, - განაცხადა ზელენსკიმ კვირას ათენში, საბერძნეთის პრეზიდენტ კონსტანტინოს ტასულასთან შეხვედრის დაწყებამდე.
ზელენსკიმ ასევე განაცხადა, რომ დღეს განიხილება საბერძნეთის მიერ უკრაინისთვის რუსეთის მიერ გატაცებული უკრაინელი ბავშვების დაბრუნებაში დახმარების საკითხი. და ბავშვთა დაბრუნების კოალიციასთან შეერთება ჩვენთვის ძალიან მნიშვნელოვანია. ჩვენ ასეთ საკითხებს დავაყენებთ“, - აღნიშნა ზელენსკიმ.
თავის მხრივ, საბერძნეთის პრეზიდენტმა ევროპელ პარტნიორებთან ერთად უკრაინას პოლიტიკურ, სამხედრო, ენერგეტიკულ და ჰუმანიტარულ დონეზე მხარდაჭერა აღუთქვა.
მან ასევე ხაზგასმით აღნიშნა, რომ საბერძნეთი „ურყევად უჭერს მხარს და პატივს სცემს გაერო-ს ქარტიას და საერთაშორისო სამართალს, რომელიც დაირღვა რუსეთის მიერ უკრაინაში შეჭრით“.
„გპირდებით, რომ საბერძნეთი გააგრძელებს თქვენს მხარდაჭერას ცეცხლის შეწყვეტისკენ მიმართულ ძალისხმევაში, რათა მიღწეულ იქნას რეალური, მდგრადი მშვიდობა უკრაინელი ხალხისთვის“, - განაცხადა ტასულასმა.
მან ასევე აღნიშნა, რომ საბერძნეთი უკრაინის მხარესაა ევროკავშირში გაწევრიანების გზაზე და დახმარებას გაუწევს ომისშემდგომ აღდგენით პროცესში.
