ხანგრძლივი „შათდაუნის“ გამო, აშშ-მა 5 მილიარდ დოლარზე მეტი ღირებულების ამერიკული იარაღის ექსპორტი შეაჩერა, რომელიც განკუთვნილი იყო ნატო-ს მოკავშირეებისა და უკრაინის მხარდასაჭერად. ამის შესახებ Axios იუწყება.
აშშ-ის სახელმწიფო დეპარტამენტის ერთ-ერთმა წარმომადგენელმა გამოცემას განუცხადა, რომ „შათდაუნი“ ზიანს აყენებს როგორც აშშ-ის მოკავშირეებსა და პარტნიორებს, ასევე ამერიკის მრეწველობას, რომელიც „ამ კრიტიკული აქტივების უმეტესობას საზღვარგარეთ ამარაგებს“.
ოფიციალური პირების თქმით, შათდაუნმა“ გავლენა მოახდინა იარაღის მიწოდებაზე, მათ შორის AMRAAM რაკეტების, Aegis-ის და HIMARS-ის საბრძოლო სისტემების მიწოდებაზე ისეთი მოკავშირეებისთვის, როგორიცაა დანია, ხორვატია და პოლონეთი.
ექსპორტის საბოლოო დანიშნულების ადგილი უცნობია, თუმცა ნატო-ს მოკავშირეებისთვის გაყიდული იარაღი ხშირად უკრაინის დასახმარებლად იგზავნება.
წყაროს თქმით, მოსალოდნელი ტრანზაქციები მოიცავს როგორც აშშ-ის მთავრობის მიერ ნატო-ს მოკავშირეებისთვის იარაღის პირდაპირ მიყიდვას, ასევე ამერიკული კერძო თავდაცვის კომპანიებისთვის იარაღის ექსპორტის ლიცენზირებას.
