მოვუწოდებთ საქართველოს მთავრობას, მოუსმინოს თავის ხალხს, იყოს ინკლუზიური, ესაუბროს სამოქალაქო საზოგადოებას და მიჰყვეს მათ სურვილს, გახდნენ ევროპის ნაწილი, - განაცხადა გაფართოების საკითხებში ევროკომისარმა, მარტა კოსმა ლუქსემბურგში, ევროკავშირის საგარეო საქმეთა მინისტრების შეხვედრის დაწყებამდე.
"მესამე საკითხი, რომელსაც დღევანდელ სხდომაზე განვიხილავთ, ეხება საქართველოში განვითარებულ შემაშფოთებელ მოვლენებს. ქართველმა ხალხმა ბოლო სამ არჩევნებში, საპროტესტო აქციებში და გამოკითხვებში აჩვენა, რომ მათ ევროპული მომავალი სურთ, მაგრამ ეს არ სურს მთავრობას. როგორც ჩანს, მათი მთავრობა არ უსმენს საკუთარ ხალხს და არ სურს ევროპული გზით სიარული. თქვენ იცით, რომ საქართველოში დაპატიმრებულნი არიან ჟურნალისტები, მთავრობის ოპონენტები და სამოქალაქო საზოგადოების ორგანიზაციებს კი აჩუმებენ. ამავდროულად, დეზინფორმაცია ევროპისა და ევროკავშირის შესახებ წახალისებულია ხელისუფლებაში მყოფთაგან. ჩვენ ვგმობთ ამ ცრუ ნარატივებს და ვგმობთ ყველა თავდასხმას ევროპულ ინსტიტუტებზე, ევროპული ინსტიტუტების წარმომადგენლებსა და ჩვენს წევრ სახელმწიფოებზე. მოვუწოდებთ საქართველოს მთავრობას, მოუსმინოს თავის ხალხს, იყოს ინკლუზიური, ესაუბროს სამოქალაქო საზოგადოებას და მიჰყვეს მათ სურვილს, გახდნენ ევროპის ნაწილი", - თქვა მან.
დღეს ლუქსემბურგში ევროკავშირის საგარეო საქმეთა საბჭოს შეხვედრა გაიმართება, სადაც სხვა საკითხებთან ერთად, საქართველოს საკითხსაც განიხილავენ.
