ტენესის შტატში, ასაფეთქებელი ნივთიერებების მწარმოებელ ქარხანაში მომხდარი ძლიერი აფეთქების შედეგად არავინ გადარჩენილა.

ხელისუფლებამ დაადასტურა, რომ დაკარგულად მინეული 16-ვე პირი დაღუპულია. ინფორმაციას BBC ავრცელებს.

ძლიერი აფეთქება 10 ოქტომბერს მოხდა საწარმო Accurate Energetic Systems-ში, რომელიც ტენესის შტატის ქალაქ ბაკსნორტში, ნეშვილიდან სამხრეთ-დასავლეთით დაახლოებით 90 კილომეტრში მდებარეობს.

ქარხანა სპეციალიზირებული იყო ასაფეთქებელი ნივთიერებების შემუშავებასა და წარმოებაში.

ჰამფრის ოლქის შერიფმა კრის დევისმა განაცხადა, რომ ინციდენტის შემდეგ დაკარგული ქარხნის 16 თანამშრომელი დაღუპულია.

მისი თქმით, სამაშველო სამსახურების წარმომადგენლებს ბოლო წამამდეჰქონდათ იმედი, რომ ვინმე ცოცხლს იპოვიდნენ, თუმცა შაბათის, 11 ოქტომბრის საღამოს მონაცემებით, „დარწმუნებით შეიძლება ითქვას, რომ ყველა დაიღუპა“.

აფეთქების მიზეზი უცნობია. ნგრევის მასშტაბები უზარმაზარია: ქარხნის შენობა მთლიანად განადგურდა, ნამსხვრევები თითქმის ერთი კილომეტრის რადიუსზე იყო მიმოფანტული, ტერიტორიაზე განთავსებული მანქანები კი დაიწვა.