სამხედრო სამსახურში გაწვევის პირველადი აღრიცხვის დროს სამედიცინო შემოწმება სავალდებულო აღარ იქნება. აღნიშნულთან დაკავშირებით ცვლილება შედის "სამხედრო ვალდებულებისა და სამხედრო სამსახურის შესახებ" კანონში.
კანონპროექტის თანახმად, რადგან გაწვევის შესახებ გადაწვეტილების მიღების შემდეგ სამხედრო-სამედიცინო საექსპერტი კომისიის მიერ ხორცილდება წვევამდელების ვარგისიანობის ხარისხისა და კატეგორიის დადგენა, აღრიცხვის დროს სამედიცინო შემოწმება დამატებით ღონისძიებას წარმოადგენს, რადგანაც შესაძლებელია ამ პერიოდში მოქალაქის ჯანმრთელობის მდგომარეობის შეცვლა.
როგორც ჯანდაცვის კომიტეტის სხდომაზე პრეზიდენტის საპარლამენტო მდივნის მოვალეობის შემსრულებელმა ირაკლი გორდილაძემ აღნიშნა, აღნიშნული ცვლილებით, ერთი მხრივ, შემცირდება სახელმწიფო ხარჯი, რადგანაც სამედიცინო კომისიის მიერ წვევამდელების აღრიცხვის დროს შემოწმება გარკვეულ ხარჯს უკავშირდებოდა და მეორე მხრივ, პროცესი უფრო დინამიკური და მარტივი გახდება.