გაეროს მიერ საქართველოში ეთნიკური უმცირესობების უფლებების შელახვაზე საუბარი რუსეთის გავლენაა.
ამის შესახებ "ჯი-ეიჩ-ენს" "ეროვნულ-დემოკრატიული პარტიის" წევრმა, დეპუტატმა გურამ ჩახვაძემ გაეროს მიერ საქართველოსთვის მიცემული რეკომენდაციების შეფასებისას განუცხადა.
"ეთნიკური უმცირესობებისგან საქართველოში მტრის ხატის შექმნის ფაქტები არ არსებობს. ვფიქრობ, რომ რეკომენდაცია რუსეთის გავლენით არის მოცემული. მაშინაც კი, როდესაც რუსეთთან ომი გქონდა, ვერც ერთ ფაქტს ვერ მოიყვანს ვერც ერთი ადამიანის უფლებების დამცავი საერთაშორისო ორგანიზაცია, რომ საქართველოში ეთნიკური რუსების უფლებები შეილახა, ან ჩვენს მიერ კონტროლირებად ტერიტორიებზე შეილახა აფხაზების, ოსების უფლებები, საუბარი აღარ არის სხვა ეთნიკურ უმცირესობებზე", - აღნიშნა ჩახვაძემ.
მისივე შეფასებით, საქართველოში მცხოვრები ყველა ეთნიკური უმცირესობა სარგებლობს ყველა იმ უფლებით, რითიც ეთნიკურად ქართველები და თუ რაიმე პრობლემაა სოციალური და ეკონომიკური კუთხით ყველა ეროვნების ადამიანზე თანაბრად ნაწილდება.
რაც შეეხება ადმინისტრაციული პატიმრობის ვადის 90 დღიდან 60 დღემდე შემცირებასა და პატიმრების უფლებების დაცვის გაძლიერებას, დეპუტატს მიაჩნია, რომ ეს გაეროს მხრიდან გონივრული შენიშვნებია.
ამასთან, ჩახვაძის თქმით, პატიმრების მდგომარეობა მართლაც გასაუმჯობესებელია და ამაზე ხელისუფლებამ უნდა იმუშაოს, რადგან მსჯავრდებულებიც საზოგადოების წევრები არიან და ის უნდა სარგებლობდეს ჯანდაცვის მომსახურებით ნორმალური და სხვა საჭირო პირობებით.
"ამ კუთხით მიდის მუშაობა, მაგრამ ეს არ არის საკმარისი და სახელმწიფომ ძალისხმევა უფრო უნდა გააძლიეროს. ასევე უნდა ოხდეს მედიის თავისუფლების კუთხით მუშაობის გაგრძელება. რაც შეეხება ზოგადად ადამიანის უფლებებს საქართველოში, ჩვენ ამ კუთხით არასდროს არ უნდა შევედაროთ პოსტსაბჭოთა სივრცეს, რადგან ჩვენი მიზანი ნატოსა და ევროკავშირში შესვლაა, ამიტომ ეს სტანდარტები უნდა დავაკმაყოფილოთ და ამ კუთხით პრობლემები გვაქვს. თუმცა, ვერ ვიტყვი, რომ ძალიან დრამატულია ან ტრაგიკულია", - აღნიშნა ჩახავაძემ.
შეგახსენებთ, რომ გაერომ საქართველოს ადამიანის უფლების დაცვის კუთხით 163 რეკომენდაცია მისცა. აქედან ქართულმა მხარემ 5 რეკომენდაციის შესრულებაზე უარი თქვა, მათ შორის ადმინისტრაციული პატიმრობის 90 დღიდან 60 დღემდე შემცირებაზე და საქართველოში ეთნიკური უმცირესობებისგან მტრის ხატის შექმნაზე.
ქართული მხარის შეფასებით, აღნიშნული რეკომენდაციას საქართველო ვერ შეასრულებს, რადგანაც საქართველოში ეთნიკური უმცირესობისგან მტრის ხატი არასდროს შექმნილა.
