საქართველოს იუსტიციის სამინისტროს საჯარო რეესტრის ეროვნული სააგენტო დოკუმენტაციის ქაღალდის ვერსიის უსაფრთხოდ შენახვისა და დაცვისთვის დიდ ლილოში თანამედროვე არქივს აშენებს. არქივის მშენებლობა, რომლის საერთო ფართი 3000 კვ.მეტრია, გასული წლის გაზაფხულზე დაიწყო.
შენობაში განთავსდება ქვეყნის მასშტაბით სარეგისტრაციო სამსახურებში უძრავ ქონებასა და ბიზნესის რეგისტრაციაზე არსებული ქაღალდის დოკუმენტაცია, ასევე სამოქალაქო რეესტრის სააგენტოსა და საქართველოს ეროვნული არქივში დაცული დოკუმენტაციის ნაწილი.
დოკუმენტაციის ახალი, თანამედროვე საარქივო სისტემის შექმნის მიზანი არსებული ქაღალდის დოკუმენტაციის შენახვისათვის საუკეთესო, უსაფრთხო პირობების შექმნა და სარეგისტრაციო სამსახურებში საარქივო ფართის მნიშვნელოვნად შემცირებაა.
საარქივო მასალა, რომელიც საჯარო რეესტრშია დაცული, ხშირ შემთხვევაში უძრავ ქონებაზე უფლების რეგისტრაციის ერთადერთი და ძირითადი საფუძველია. საჯარო რეესტრის თანამშრომლებს თითქმის ყოველდღიურად უხდებათ საარქივო მასალებთან შეხება. მათი უმრავლესობა საკმაოდ ძველია. იქმნებოდა საფრთხე, რომ დროთა განმავლობაში, ხშირი გამოყენების გამო, შესაძლებელი იყო დოკუმენტები დაზიანებულიყო ან განადგურებულიყო.
სწორედ ამიტომ, საჯარო რეესტრმა არსებული საარქივო სისტემის წინასწარი შესწავლისა და ანალიზის შემდეგ შეიმუშავა დოკუმენტაციის საარქივო სტრატეგია, რომელიც ეფუძნება მცირე დანახარჯებს, ინფორმაციის ადვილად ხელმისაწვდომობას და ქაღალდის დოკუმენტების ხანგრძლივი ვადით საუკეთესოდ შენახვას.
თანამედროვე საარქივო სისტემა მოიცავს დოკუმენტაციის ძებნის გამარტივებას, ფართის რაციონალურად გამოყენებას, სათანადო კლიმატური პირობების შექმნას, სტანდარტული ბაინდერებისათვის სტაციონალური და მოძრავი სტელაჟების მოწყობას, რომელიც მარტივად, ხელის მოძრავი მექანიზმით, იატაკზე დამონტაჟებულ სპეციალურ რელსებზე გადაადგილდება.
2006 წლიდან საჯარო რეესტრის ეროვნულ სააგენტოში დაიწყო არსებული დოკუმენტაციის სკანირება და ელექტრონულ ფორმატში გადატანა. შესაბამისად, ქაღალდის ვერსიის გამოყენება მხოლოდ დოკუმენტის ჩანაწერში ეჭვის შეტანის შემთხვევაში არის საჭირო.ამ შემთხვევაში მოქალაქეებს შესაძლებლობა ეძლევათ გაეცნონ არა მხოლოდ საჭირო დოკუმენტის ელექტრონულ ფორმატს, არამედ ამ დოკუმენტის ქაღალდის ვერსიას ანუ დედანს და დაადგინოს მისი იდენტურობა.
არქივის მშენებლობა 2011 წლის მარტში დასრულდება.
