აშშ-ის პრეზიდენტი დონალდ ტრამპი 15 აგვისტოს ალასკაში რუსეთის პრეზიდენტ ვლადიმირ პუტინთან შეხვედრის დროს ტერიტორიულ საკითხებს არ განიხილავს.
ამის შესახებ The Wall Street Journal წერს.
აღნიშნულია, რომ ამერიკის ლიდერი რუსეთ-უკრაინის ომში დაუყოვნებლივ ცეცხლის შეწყვეტის მიღწევას შეეცდება, რაც მან ევროპელ პარტნიორებს ვიდეოკონფერენციის დროს განუცხადა.
ვირტუალურ სამიტზე ტრამპს შეუერთდნენ ვიცე-პრეზიდენტი ჯეი დი ვენსი, სტივ უიტკოფი და ტრამპის წარმომადგენელი უკრაინაში, კიტ კელოგი.
შეხვედრაში ასევე მონაწილეობდნენ უკრაინის, გერმანიის, საფრანგეთის, დიდი ბრიტანეთის, იტალიის, პოლონეთის, ფინეთის, ევროკავშირისა და ნატო-ს ლიდერები. კონფერენციის მიზანი იყო პუტინისა და ტრამპის მოლაპარაკებების წინ შეერთებული შტატებისა და ევროპის საერთო პოზიციის ჩამოყალიბება.
ვირტუალური სამიტის შემდეგ, გერმანიის კანცლერმა ფრიდრიხ მერცმა განაცხადა: „ტრამპმა დაარწმუნა ევროპელი კოლეგები, რომ მოლაპარაკებას არ აწარმოებს ტერიტორიულ საკითხებზე, რომლებიც უკრაინამ რუსეთთან უნდა განიხილოს“.
შეხვედრაზე ამერიკელმა ლიდერმა პირობა დადო, რომ დაუყოვნებლივ მოითხოვს ცეცხლის შეწყვეტას, თუმცა, საუბრის ორი მონაწილის თქმით, ის არ ელოდება, რომ პუტინი ამაზე დათანხმდება.
„ჩვენ, ევროპელები, ყველაფერს ვაკეთებთ, რაც ჩვენს ძალებშია, რათა ამ შეხვედრისთვის სწორი საფუძველი ჩავყაროთ, რადგან გვსურს, რომ დონალდ ტრამპმა პარასკევს ანკორიჯში წარმატებას მიაღწიოს.
ალასკაში უკრაინისა და ევროპის ფუნდამენტური ინტერესები უნდა იყოს უზრუნველყოფილი - ეს იყო გზავნილი, რომელიც აშშ-ის პრეზიდენტს გადავეცით“, - განაცხადა მერცმა.
საფრანგეთის პრეზიდენტმა ემანუელ მაკრონმა ასევე ისაუბრა ტრამპის განზრახვებზე, მიაღწიოს ომში ცეცხლის შეწყვეტას.
„პრეზიდენტმა ტრამპმა ნათლად განაცხადა, რომ შეერთებული შტატები ერთგულია ალასკაში ამ შეხვედრაზე ზავის მიღწევის“, - განუცხადა მან ჟურნალისტებს.
