ადვოკატი ლალი აფციაური აცხადებს, რომ ზაჰესის დროებითი მოთავსების იზოლატორში ალექსი ახვლედიანს უმძიმესი სტრესი აქვს მიღებული, მისივე თქმით, ახვლედიანს საქმესთან დაკავშირებით არაფერი უთქვამს.
„ბრალი წარდგენილი არ აქვს, ხანმოკლე ვიზიტი მქონდა, ვერ ვესაუბრე, ისეთი სტრესი აქვს მიღებული. ფიზიკურად ვერ მივიღე მისგან ინფორმაცია, უმძიმესი სტრესი აქვს მიღებული. არაფერი უთქვამს მასაც და არც მე დამისვამს რამე კითხვა“, – განაცხადა ალექსი ადვოკატმა ჟურნალისტებს.
ცთორნიკე რიჟვაძის საქმეზე ბრალდებულის სახით დაკავებულია საზღვაო ტრანსპორტის სააგენტოს უფროსი ალექსი ახვლედიანი. ახვლედიანი საქართველოს სისხლის სამართლის კოდექსის 238-ე მუხლით არის დაკავებული, რაც ცეცხლსასროლი იარაღის დაუდევრად შენახვას გულისხმობს.
შეგახსენებთ,, დღეს დილით, შინაგან საქმეთა სამინისტრომ გაავრცელა ინფორმაცია, რომ საგარეჯოს „ჯეოჰოსპიტალსში“, შეყვანილი იქნა ა/რ მთავრობის ყოფილი თავმჯდომარე თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა. უწყების ინფორმაციით, თორნიკე რიჟვაძეს ჩაუტარდა გადაუდებელი სამედიცინო დახმარება. ექიმების განმარტებით, მას ფილტვი აქვს დაზიანებული და მისი ჯანმრთელობის მდგომარეობა სტაბილურად მძიმეა.
მოგვიანებით კი, რიჟვაძე საგარეჯოდან პირველ საუნივერსიტეტო კლინიკაში გადაიყვანეს.
პირველი საუნივერსიტეტო კლინიკის დირექტორმა, ლევან რატიანის თქმით, აჭარის მთავრობის ყოფილი თავმჯდომარის “მდგომარეობა დადებითი დინამიკითაა, თუმცა კვლავ მართვით სუნთქვაზე იმყოფება“.
