აშშ-ის პრეზიდენტ დონალდ ტრამპის ადმინისტრაციამ „ამერიკის ხმის“ 600-ზე მეტ თანამშრომელს სამსახურიდან გათავისუფლების შესახებ შეტყობინება გაუგზავნა. ამის შესახებ The New York Times იუწყება.
ამ შემცირებით, „ამერიკის ხმის“ თანამშრომლები 200-ზე ნაკლებ ადამიანამდე შემცირდება, რაც 2025 წლის დასაწყისისთვის არსებული რაოდენობის დაახლოებით ერთ მეშვიდედს შეადგენს.
1 სექტემბრამდე ჟურნალისტები და ტექნიკური პერსონალი ანაზღაურებად შვებულებაში იქნებიან, შემდეგ კი სამსახურიდან გაათავისუფლებენ.
გამოცემა აღნიშნავს, რომ გასულ კვირას ტრამპის ადმინისტრაციამ ისრაელსა და ირანს შორის კონფლიქტის ესკალაციასთან დაკავშირებით სპარსულენოვანი სამსახურის ზოგიერთი თანამშრომელი დროებით დააბრუნა სამსახურში.
თუმცა, მათგან სულ მცირე ორმა 20 ივნისს ასევე მიიღო გათავისუფლების შესახებ შეტყობინება.
„ამერიკის ხმის“ საიტები - როგორც ინგლისურენოვანი, ასევე რეგიონული სამსახურები, მათ შორის ქართული რედაქცია, - მარტის შუა რიცხვებიდან არ განახლებულა.
„ეპოქა დასრულდა. დამთავრდა „ამერიკის ხმის“ 80- წლიანი მაუწყებლობა, მილიონებს შეუწყდა ეს ხმა მთელს მსოფლიოში, დაგვაკლდება გამალებული ზრუნვა ქართული აუდიტორიისთვის და დავაკლდებით მასაც“, - წერს ანა კალანდაძე, ვაშინგტონში „ამერიკის ხმის“ ქართული რედაქციის აწ უკვე ყოფილი ხელმძღვანელი.
დღეს „ამერიკის ხმა“ მხოლოდ ოთხ ენაზე მაუწყებლობს და რადიომაუწყებლობა მხოლოდ ავღანეთშია შენარჩუნებული.
2025 წლის თებერვალში, შემცირებებამდე, სააგენტოში დაახლოებით 1300 ჟურნალისტი იყო დასაქმებული, რომლებიც 49 ენაზე მაუწყებლობდნენ მსოფლიოს მასშტაბით 360-მილიონიანი აუდიტორიისთვის.
