აშშ-ის პრეზიდენტმა დონალდ ტრამპმა განაცხადა, რომ მას მილიარდერ ილონ მასკთან „შესანიშნავი“ ურთიერთობა ჰქონდა, თუმცა ახლა ბიზნესმენით „იმედგაცრუებულია“.
ასე უპასუხა მან ჟურნალისტების თხოვნას, კომენტარი გაეკეთებინა მასკის განცხადებებზე, რომელშიც კრიტიკულად იყო განწყობილი რესპუბლიკელების კანონპროექტი საგადასახადო შეღავათებისა და ბიუჯეტის გახანგრძლივების შესახებ.
„მესმის, რატომ არის განაწყენებული.. მისმინეთ, მე და ილონს შესანიშნავი ურთიერთობა გვქონდა. არ ვიცი, ისევ ასეთი იქნება თუ არა. მან ჩემზე ყველაზე შესანიშნავო რაღაცები თქვა და ცუდი არაფერი უთქვამს, მაგრამ დარწმუნებული ვარ, რომ შემდეგ ჯერზე შეიძლება ეს მოხდეს. მაგრამ ილონით ძალიან იმედგაცრუებული ვარ. მე მას ძალიან ვეხმარებოდი,“ განაცხადა ტრამპმა გერმანიის კანცლერ ფრიდრიხ მერცთან თეთრი სახლის ოვალურ კაბინეტში შეხვედრისას.
კითხვაზე, სერიოზულად უნდა იქნას აღქმული თუ არა მასკის კომენტარები სამთავრობო ხარჯებთან დაკავშირებით, ტრამპმა უპასუხა: „არა“.
„მან [მასკმა] ბევრი იშრომა და კარგი სამუშაო შეასრულა. და გულწრფელად რომ ვთქვა, ვფიქრობ, რომ მას ეს ადგილი ენატრება.
მგონია, ის გავიდა ქუჩაში და უცებ ამ ულამაზეს ოვალურ კაბინეტში აღარ იყო. მირჩევნია, რომ მან კანონპროექტის ნაცვლად მე გამაკრიტიკოს, რადგან კანონპროექტი წარმოუდგენელია“, - აღნიშნა აშშ-ის პრეზიდენტმა.
ილონ მასკმა აშშ-ის მთავრობის ეფექტიანობის დეპარტამენტის ხელმძღვანელის პოზიცია გასულ კვირას დატოვა. აღნიშნულ დეპარტამენტს, რომელიც ხარჯების შესამცირებლად შეიქმნა, მასკი 129 დღის განმავლობაში ხელმძღვანელობდა.
ამის შემდეგ მილიარდერი ბიზნესმენი თითქმის განუწყვეტლივ აკრიტიკებდა ტრამპის კანონპროექტს გადასახადების შემცირებისა და საბიუჯეტო ხარჯების შემცირების შესახებ. მასკმა 4 ივნისს X-ზე გამოქვეყნებულ პოსტში კანონპროექტს "გულისამრევი საშნელებაც" უწოდა და დაამატა: "სირცხვილი მათ, ვინც ამას მხარი დაუჭირა: თქვენ იცით, რომ არასწორად მოიქეცით".
კანონპროექტი ზოგიერთ სფეროში, მათ შორის თავდაცვისთვის და მიგრაციული პოლიტიკის გასატარებლად ხარჯების გაზრდას, სახელმწიფო ვალის ლიმიტის გაზრდას და საგადასახადო შეღავათებს ითვალისწინებს.
