ეგვიპტის ქალაქებში შეტაკებები და ხანძარია. კაიროში ჯარი დგას. შემოღებულია კომენდანტის საათი. ოპოზიციონერ ელ-ბარადეის ბედი, რომელიც მუბარაკის გადაყენების მოწოდებით გამოვიდა, უცნობია. არსებობს ინფორმაცია მისი დაკავების შესახებ.
არეულობა კაიროში საღამოს ლოცვის შემდეგ განახლდა. აქციის მონაწილეები პრეზიდენტ ჰოსნი მუბარაკის წინააღმდეგაა მიმართული. არეულობა მთელი ქვეყნის მასშტაბითაა და მათში ახალ-ახალი რაიონები ერთვებიან. კაიროში ეგვიპტის არმიის ელიტური დანაყოფებია შეყვანილი. ქვეყანაში კომენდანტის საათი მოქმედებს.
კაიროში მომხდარი არეულობების შედეგად, ამ დროისთვის გავრცელებული ინფორმაციით, დაღუპულია სამი კაცი. სამივე სამოქალაქო პირია. წინასწარი ინფორმაციით, მათი დაღუპვის მიზეზი რეზინის ტყვიებით მიყენებული ძლიერი ჭრილობებია, რომლითაც პოლიცია ამბოხებულების დაშლას ცდილობს. დაშავებულთა შორის არიან ასევე ჟურნალისტები და საზოგადო მოღვაწეები.
ეგვიპტის დედაქალაქში ხალხი პრეზიდენტის სასახლესთან იკრიბება. ქვეყნის მთავარ მეჩეთში ალ-ახზირში შეკრებილია ათასობით ადამიანი. პოლიცია ცრემლსადენ გაზსა და რეზინის ტყვიებს იყენებს. იგივე სიტუაციაა ქალაქის ცენტრალურ მოედანზე. მომიტინგეები პოლიციას ქვებს ესვრიან. ინფორმაციას ამის შესახებ სააგენტო "როიტერი" ავრცელებს.
ქვეყნის მთავრობა დუმილს აგრძელებს და არავითარ ოფიციალურ განცხადებას არ აკეთებს.
საპროტესტო აქციები ეგვიპტის ერთდროულად რამდენიმე ქალაქში მიმდინარეობს. გავრცელებული ინფორმაციით, ამბოხებულებმა დაიკავეს ქალაქი სუეცი. ვრცელდება ინფორმაცია იმის შესახებ, რომ სამხედრო ძალა ქალაქს ტოვებს. "როიტერის" ინფორმაციით, ამბოხებულებს პოლიციის მიერ მოკლული 30 წლის მამაკაცის ცხედარი მთელ ქალაქში დააქვთ.
ეგვიპტის სიდიდით მეორე ქალაქ ალექსანდრიაში, "როიტერის" ინფორმაციით, სამართალდამცავები ასევე ტოვებენ ქალაქს. ალექსანდრიას მთლიანად ამბოხებულები აკონტროლებენ. იწვის მერიის შენობა. ამბოხებულები ასევე აკონტროლებენ ქალაქ ლუქსორს.
