აფხაზ სეპარატისტთა ლიდერმა სერგეი ბაღაფშმა აფხაზი ოპოზიციონერი იაკუბ ლაკობა იმიტომ დააპატიმრა, რომ იგი სოხუმის ე.წ. ხელისუფლების წარმომადგენლებთან დაკავშირებული მსხვილი რუსული ბიზნესის ინტერესებს შეეხო. ასეთი აზრი გამოთქვა დამოუკიდებელმა ექსპერტმა ანატოლი ოტირბამ რუსი ჟურნალისტის სტატიაში სახელწოდებით "ბაღაფშმა წითელი ხაზი გადაკვეთა".
"ამ პრობლემის ფესვები ბაღაფშ-სტეპაშინ-"ვი-თი-ბი"-ს სამკუთხედში უნდა ვეძებოთ. საქმე იმაშია, რომ რუსეთის ამ ერთ-ერთი უმსხვილესი ბანკის ვიცე-პრეზიდენტი თამარა სტეპაშინაა - რუსეთის კონტროლის პალატის ხელმძღვანელის სერგეი სტეპაშინის მეუღლე.
"ვი-თი-ბი" ბანკი კი აფხაზეთში სულ ახლახანს შემოვიდა და რკინიგზის აღდგენის დაფინანსებას აპირებს, რომელიც ამის შემდეგ "რუსეთის რკინიგზის" იჯარის ქვეშ აღმოჩნდება", _ აცხადებს ექსპერტი და აღნიშნავს, რომ ყოველივე ზემოთქმულიდან გამომდინარე თუკი ოპოზიცია, კერძოდ, ლაკობა თავისი გამონათქვამებით სოხუმის ე.წ. ხელისუფლებასთან გადაჯაჭვული მსხვილი რუსული ბიზნესის ინტერესებს შეეხო, მისი დაპატიმრება არც თუ ისე მოულოდნელად გამოიყურება.
აღსანიშნავია, რომ აფხაზეთის ე.წ. გენერალურმა პროკურატურამ სეპარატისტულ აფხაზეთში მოქმედი "ხალხის პარტიის" ლიდერი იაკუბ ლაკობა რუსეთის კონტროლის პალატის ხელმძღვანელ სერგეი სტეპაშინის მისამართით გამოქვეყნებული სტატიის გამო დააპატიმრა. სტატიაში ლაკობამ სტეპაშინს "პოლიტიკური ინტრიგანი და შანტაჟისტი" უწოდა. ლაკობამ სტეპაშინი რუსეთის მიერ აფხაზეთისათვის გამოყოფილი თანხების აფხაზეთის ე.წ. ხელისუფლების მიერ არამიზნობრივად ხარჯვის შესახებ გავრცელებული ცნობების ყურადღების მიღმა დატოვებაში დაადანაშაულა. აფხაზი ოპოზიციონერის წინააღმდეგ საქმე "ცილისწამება, დაკავშირებული განსაკუთრებით მძიმე დანაშაულთან" იყო აღძრული.
"ვერავინ ბაღაფშის გარდა, ვერ მიიღებდა იაკუბ ლაკობას დაპატიმრების გადაწყვეტილებას. აფხაზურ პოლიტიკაში არის მკაფიოდ განსაზღვრული "წითელი ხაზი", რომლის გადასვლა არ შეიძლება. რა მკაცრიც არ უნდა იყოს პოლიტიკური ბატალიები იგი მაინ ადამიანურ ურთიერთობებს ეფუძნება და მისი გადასვლით პოლიტიკოსი არა მხოლოდ წონას კარგავს ელიტაში არამედ კარგავს პატივისცემას", _ წერს რუსი ჟურნალისტი და აგრძელებს, რომ იაკუბ ლაკობა კოლორიტული პიროვნებაა, რომელიც განუზომლად დიდი ავტორიტეტით სარგებლობს თავისი სამართლიანობისა და მოუსყიდველობის გამო. ამასთან ერთად, იგი სერგეი ბაღაფშის კლასელია.
"ლაკობასა და სტეპაშინის დაპირისპირებაში მოსახლეობა ნებისმიერ შემთხვევაში თანამემამულეს დაუჭერს მხარს. მიუხედავად სტეპაშინის სურვილისა დაეცვა ხელისუფლება ოპოზიციის იერიშებისგან ფაქტი რჩება ფაქტად - მისი უწყების მიერ გამოქვეყნებულ ანგარიშში, რომელიც გადარიცხული თანხის ეფექტურ ხარჯვას ეხება გამოვლენილია დანაკლისი დაახლოებით 347 მილიონი რუბლის ოდენობით.
"შესრულებული სამუშაოსათვის მომატებული რაოდენობის გადახდილი თანხა", "საბიუჯეტო დისციპლინის დარღვევა" და "ფინანსური პროცესის არაგამჭირვალობა" - არსებითად ამას სწორედ თანხების ქურდობა ქვია და იგი სისხლის სამართლის კანონმდებლობით ისჯება, ამიტომაც მოსალოდნელი იყო, რომ ამ ანგარიშის გამოქვეყნების შემდეგ სისხლის სამართლის მრავალი საქმე აღიძვრებოდა, თუმცა, პირველი ადამიანი ვის წინააღმდეგად სისხლის სამართლის საქმე აღიძრა ოპოზიციონერი იაკუბ ლაკობა იყო", _ წერს ჟურნალისტი.
