რამდენიმე არაბულ ქვეყანაში ძლიერი საპროტესტო აქციები მიმდინარეობს. როგორც ექსპერტმა ირაკლი მენაღარიშვილმა "ჯი-ეიჩ-ენს" განუცხადა, ეს აქციები ამ ქვეყენებში დიდი ხნის განმავლობაში არსებული ავტორიტარული რეჟიმების შეცვლის სურვილს უკავშირდება.
"ჯერჯერობით რაიმე სერიოზული ანალიზის გაკეთება რთულია. ზედაპირული ანალიზით, იმის თქმა შეიძლება, რომ ეს აქციები დიდი ხნის განმავლობაში ავტორიტატული რეჟიმების ყოფნას უკავშირდება. საქმე გვაქვს ისეთ მოვლენასთან, რომ ამ ქვეყნებში დემოკრატიული მოთხოვნების ლოზუნგი ვითარდება. მსგავსი შემთხვევები დაფიქსირდა ყოფილ საბჭოთა კავშირის ქვეყნებში. რაც შეიძლება ითქვას ყირგიზეთზე. მსგავსი მუხტი იყო უზბეკეთშიც, თუმცა, ხელისუფლებამ მწვავე მეთოდებით ჩაახშო", - განაცხადა მენაღარიშვილმა "ჯი-ეიჩ-ენთან" საუბრისას.
მისი თქმით, ამ ეტაპზე მსოფლიო ლიდერებმა არ უნდა მიიღონ გადაწყვეტილება, მაგალითად ეგვიპტისა და ტუნისის შიდა საქმეებში ჩარევისა.
"ეს ამ ეტაპზე არ შეიძლება და უკანონოც იქნება. თუ მშვიდობიანი მუხტი სამოქალაქო დაპირისპირებაში გადაიზარდა, მერე უკვე შესაძლებელია. მანამდე კი სხვადასხვა ქვეყნები სხვადასხვანაირად შეიძლება დაეხმარონ, იგივე ჰუმანიტარული დახმარებით, რადგან, როდესაც ესეთი მოვლენები ვითარდება, ეკონომიკური პრობლემები იჩენს ხოლმე თავს ქვეყანაში", - განმარტავს მენაღარიშვილი.
შეგახსენებთ, რომ მწვავე საპროტესტო აქციები ტუნისში დაიწყო, რაც ქვეყნის პრეზიდენტის შეცვლით დამთავრდა.
ანალოგიური აქციები მიმდინარეობს ეგვიპტესა და იემენშიც.
ეგვიპტეში საგანგაშო მდგომარეობაა გამოცხადებული. დაკავებულია ასობით აქციის მონაწილე და რამდენიმე ოპოზიციური ლიდერი.
