დღეს, 27 იანვარს, 15:00 საათზე, გორში, სოფელ ხელთუბანში, მეფრინველეობის ახალ მინიფაბრიკა გაიხსნება. მინიფაბრიკა გათვლილია 2-თვიანი ციკლით 8000 ქათმის გაზრდაზე და მასში 15 ადგილობრივი მოსახლე დასაქმდება.
პროექტის ფარგლებში შეიქმნა სათემო ორგანიზაცია. იგი აერთიანებს 20 ოჯახს, რომლის ოჯახის წევრებიც იქნებიან დასაქმებულნი მინიფაბრიკაში. სათემო ორგანიზაციის წევრებს ჩაუტარდებათ სხვადასხვა სახის ტრეინინგი, რომლებიც ხელს შეუწყობს ხარისხიანი პროდუქციის შექმნას, პროდუქციის რეალიზაციასა და ორგანიზაციის სიცოცხლისუნარიანობას.
ქათმის საკვებისთვის საჭირო ნედლეული, კერძოდ სიმინდი, შეძენილი იქნება ახლომდებარე ბერბუკის ახალ ჩასახლებაში მცხოვრებ დევნილებისგან, რაც საშუალებას მისცემს დევნილებს, გაზარდონ თავიანთი შემოსავალი.
აღნიშნული პროექტი გაეროს ლტოლვილთა უმაღლესი კომისრის წარმომადგენლობამ საქართველოში, მისი პარტნიორი ორგანიზაციის - საერთაშორისო დახმარებისა და განვითარების სააგენტოს მეშვეობით, განახორციელა.
შეგახსენებთ, რომ გაეროს ლტოლვილთა უმაღლესი კომისარის წარმომადგენლობა საქართველოში, ახორციელებს დაახლოებით 355,000 ადამიანის სამართლებრივ დაცვას და მათი პრობლემების გრძელვადიანი გადაჭრის საშუალებათა გამონახვას, რაც მოიცავს 350,000 ქვეყნის შიგნით იძულებით გადაადგილებულ პირებს, 1,600 სტატუსის არმქონე პირებს და დაახლოებით 1000 ლტოლვილს.