2011 წლიდან ამოქმედებული ახალი საგადასახადო კოდექსით დაინერგა კეთილსინდისიერი გადამხდელის (GOOD FAITH) პრინციპი. ამ პრინციპის თანახმად, როგორც საგადასახადო ორგანოს, ისე - საგადასახადო დავის განმხილველ ორგანოს, უფლება აქვს გააუქმოს გადამხდელის მიმართ გამოყენებული სანქცია, თუ გადამხდელს ზიანი არ მიუყენებია ბიუჯეტისთვის და მისი ქმედება განპირობებული იყო შეცდომით ან არცოდნით.
საქართველოს ფინანსთა სამინისტროსთან არსებულმა დავების განხილვის საბჭომ სწორედ ამ პრინციპით იხელმძღვანელა, როდესაც შპს „აჭარა ტექსტილის" (Puma) საჩივარი განიხილა.
საჩივარი შეეხებოდა გადამხდელის მიერ საბაჟო დეკლარაციაში არასწორი მონაცემების შეტანისთვის დაკისრებულ ჯარიმას.
საბჭომ შეაფასა საქმესთან დაკავშირებული ფაქტობრივი გარემოებები და დაადგინა, მართალია, დეკლარაციაში მონაცემები არასწორად იყო შეტანილი, მაგრამ მომჩივნის ქმედებას არ გამოუწვევია ზიანი ბიუჯეტისთვის და ამასთან, დარღვევის მიზეზი იყო მომჩივნის მექანიკური შეცდომა, რაც დასტურდებოდა მომჩივნის მიერ წარმოდგენილი ინვოისითაც.
შესაბამისად, დავის განმხილველმა ორგანომ ჩათვალა, რომ მომჩივანი წარმოადგენდა კეთილსინდისიერ გადამხდელს და სრულად გააუქმა მასზე დაკისრებული სანქცია.
შპს „აჭარა ტექსტილის" შემთხვევა ადასტურებს, რომ ბიზნესისათვის ახალი საგადასახადო კანონმდებლობით შეთავაზებული სიახლეები უკვე რეალურ მოქმედებაშია და მისი მიზანი პატიოსანი გადამხდელის ინტერესების დაცვაა
