რუსეთის ფედერაციამ ოკუპირებულ აფხაზეთში რკინიგზის შესაკეთებლად 35 ჩელიაბინსკელი (სამხრეთ ურალის რკინიგზა) სპეციალისტი შეიყვანა.
გავრცელებული ინფორმაციის თანახმად, რკინიგზელთა შემდეგი პარტიაა აფხაზეთში მიმდინარე წლის 27 იანვარს უნდა ჩავიდეს.
სპეციალისტების მიზანია ფსოუ-ოჩამჩირის მონაკვეთზე რკინიგზის აღდგენა-შეკეთება. სამუშაოს შესასრულებლად დაგეგმილია რუსეთის რკინიგზის სამი ბრიგადის (800 სპეციალისტი) გამოყენება.
ოკუპირებულ ტერიტორიებზე რუსეთის მიერ განხორციელებული სამხედრო ხასიათის ქმედებების გათვალისწინებით (საზენიტო-სარაკეტო კომპლექსის ს-300, საარტილერიო სარაკეტო დივიზიონის "სმერჩის", ოპერატიულ-ტექნიკური სარაკეტი დივიზიონის "ტოჩკა-უ"-ს განლაგება, გამუდმებული სამხედრო წრთვნები და ა.შ.), საქართველოს საგარეო საქმეთა სამინისტრო მიიჩნევს, რომ რომ ამ შემთხვევაში რუსეთის მიზანია ინფრასტრუქტურის შექმნა სამხედრო დანიშნულებისთვის, კერძოდ საქართველოს ამ ოკუპირებულ ტერიტორიაზე მძიმე სამხედრო ტექნიკისა და დიდი რაოდენობით ცოცხალი ძალის გადაზიდვისათვის.
"2008 წლის აგვისტოში რუსეთის მიერ საქართველოს წინააღმდეგ განხორციელებულ სრულმასშტაბიან სამხედრო აგრესიას წინ უძღოდა რუსეთის სარკინიგზო ჯარების შეყვანა აფხაზეთში, საქართველო რკინიგზის სწორედ ამ მონაკვეთის "აღდგენა-შეკეთების" მიზნით", - ნათქვამია საგარეო უწყების განცხადებაში.
საქართველოს საგარეო საქმეთა სამინისტრო რუსეთის მიერ საქართველოს ოკუპირებულ ტერიტორიების მილიტარიზაციასთან დაკავშირებით პროტესტს გამოთქვამს და მოითხოვს რუსეთის ფედერაციისგან, შეასრულოს ნაკისრი საერთაშორისო ვალდებულებები, მათ შორის, 2008 წლის 12 აგვისტოს ცეცხლის შეწყვეტის შეთანხმება, აიღოს ვალდებულება ძალის არგამოყენების შესახებ და მოახდინოს საქართველოს ტერიტორიის სრული დეოკუპაცია.
