"ახალი მემარჯვენეების" შეფასებით, საქართველოს პრეზიდენტი მიხეილ სააკაშვილი ვეტერანების საკითხზე უზრდელი და თავხედი იყო.
ამის შესახებ "ჯი-ეიჩ-ენს" პარტია "ახალი მემარჯვენეების" ერთ-ერთმა ლიდერმა მამუკა კაციტაძემ, "პრეზიდენტის პასუხობს ხალხს" პროექტის ფარგლებში პრეზიდენტის გამოსვლის შეფასებისას განუცხადა.
"რაც შეეხება ვეტერანთა საკითხს, ამ ნაწილში სააკაშვილი უბრალოდ უზრდელი იყო და თავხედურ პასუხი გასცა. ადამიანები, რომლებმაც თავის თავი სამსხვერპლოზე მიიტანეს და ავად თუ კარგად სამშობლოს ტერიტორიული მთლიანობის შენარჩუნებას იცავდნენ, თურმე შეურაცხმყოფლები არიან იმ ვეტერანებისა, რომელთა გვარებიც ამოტვიფრულია კედელზე. თურმე დღევანდელი ვეტერანები ჩვენი ქვეყნის სირცხვილი და დაღუპულთა სულების შეურაცხმყოფელები არიან. ეს არც მეტი არც ნაკლები თავხედური გამოხატულებაა და ამ ტიპის ქცევა პირდაპირ უკავშირდება მისი აღზრდისა დაAზრდილობის საკითხს", - აღნიშნა კაციტაძემ.
შეგახსენებთ, რომ ტელეკომპანია "პირველი საინფორმაციო კავკასიურის" პირდაპირ ეთერში სტუმრად მყოფი მიხეილ სააკაშვილი ომის ვეტერანების დარბევის საკითხსაც შეეხო. მისი აზრით, ყველა ვეტერანს აქვს პროტესტის გამოთქმისა და სოციალური პრივილეგიების მოთხოვნის უფლება. თუმცა პრეზიდენტი მიიჩნევს, რომ სამშობლოსგან რაღაცას კი არ უნდა ითხოვდე, არამედ სამშობლოს დაცვა უნდა იყოს ყველა ადამიანის პრივილეგია.
"აქ დგას ორი ჯარისკაცი, მსოფლიოს ყველა ქვეყანაში ეს არის უწმინდესი ადგილი, არის მარადიული ცეცხლი. ამ დროს კი იქ მივიდა ექვსი კაცი, დააფარეს საქართველოს ძველი დროშა, ამ ორ ჯარისკაცს ჩაუდგეს თავისი საწოლები, გამოფინეს საცვალი, მოშარდეს მარადიული ცეცხლის გვერდზე. ასეთ დროს პოლიციის გამოყენება თურმე არის პოლიტიკური ჩარევა", _ აცხადებს პრეზიდენტი.
მისი თქმით, ეროვნული სიმბოლოების პატივისცემა მარტო მთავრობის პრივილეგია არ არის, ესაა განსაკუთრებული ნიჭი, რაც თითოეულ ადამიანს უნდა ჰქონდეს.
