ცხადია, რომ ჩვენ არ ვეთანხმებით გირაოს გამოყენებას, ეს გადაწყვეტილება გასაჩივრდება - ამის შესახებ კოალიცია „ძლიერი საქართველოს“ ერთ-ერთმა ლიდერმა, ბადრი ჯაფარიძემ სასამართლოდან გამოსვლის შემდეგ.
“სამწუხაროდ, სასამართლო მხოლოდ ნოტარიუსის ფუნქციას ასრულებს, რასაც პროკურატურა ითხოვს, იმას უბრალოდ ავტომატურად ადასტურებს.
აქ იყო ძალიან მნიშვნელოვანი, სოლიდური არგუმენტები წარმოდგენილი, რომ ეს კომისია არის უკანონო, ის რომ არ აკმაყოფილებს საგამოძიებო კომისიის შექმნის მოთხოვნებს. გარდა იმისა, რომ არალეგიტიმური პარლამენტის მიერ არალეგიტიმური კომისიაა, თვითონ კომისიაც შექმნილია პირდაპირი კანონის დარღვევით, რომელიც საზღვრავს რომ მინიმუმ 50% კომისიის წევრებისა უნდა იყოს ოპოზიციიდან და ამაზე პასუხი მივიღეთ, რომ კვოტა არის გამოყოფილი ოპოზიციისთვის. ახლა ეს არის სასამართლოზე და კანონზე დაცინვა.
ამიტომ, მე მიმაჩნია, რომ რა თქმა უნდა, არანაირ კანონდარღვევას ადგილი არ ქონია. ეს არის პოლიტიკური თაღლითობით შექმნილი რაღაც ადამიანების ჯგუფი, რომელიც თავს საგამოძიებო კომისიად მოიხსენიებს და მათ დაძახებულზე, რა თქმა უნდა, მისვლას არ ვაპირებ.
იმაზე საუბარი, რომ თითქოს ეს საგამოძიებო კომისია შედგება ოპოზიციისგან იმიტომ, რომ ის ადამიანები, რომლებიც გავიდნენ "ქართული ოცნების" სიით, მათ ერთი სიტყვა კრიტიკული არასდროს არ უთქვამთ არც ბიძინა ივანიშვილზე და არც "ქართულ ოცნებაზე" და როგორ შეიძლება ეს იყოს ოპოზიცია.
მეორეც, გახარიას პარტიამ თქვა, რომ არ აპირებს ე.წ. კომისიაში მონაწილეობას იმიტომ, რომ არალეგიტიმურად მიიჩნევს მას. შესაბამისად, კანონის უხეში დარღვევაა, როდესაც ეს კომისია თავს საგამოძიებო კომისიას უწოდებს. ეს არის ერთპარტიული დაჯგუფება, რომელიც ცდილობს გამოიყენოს ვითომ და საგამოძიებო კომისიის პლატფორმა ოპონენტების გასაშავებლად.
მე როდესაც ვიყავი 90-92 წლებში უზენაესი საბჭოს წევრი გადატრიალების შემდგომ სიცოცხლის მოსპობის რისკის მიუხედავად არ წავსულვარ ამ ქვეყნიდან, შემდგომ როცა ბიძინა ივანიშვილის მხრიდან დაიწყო დევნა და 9 წლიანი მუხლი მომიყენეს, მაშინაც არ წავსულვარ ამ ქვეყნიდან. არ ვაპირებ არსად წასვლას, შესაბამისად ვითომ და მიმალვის რისკი არსებობდა, ეს არის სიცრუე. ცხადია, რომ ჩვენ არ ვეთანხმებით ამ გირაოს გამოყენებას. ეს გადაწყვეტილება გასაჩივრდება", - ამბობს ბადრი ჯაფარიძე.
შეგახსენებთ, ბადრი ჯაფარიძეს აღკვეთის ღონისძიების სახით 50 000-ლარიანი გირაო შეეფარდა.
