საქართველოს პრეზიდენტი მიხეილ სააკაშვილი 2006-07 წლებში სამხედრო ავანტურის დაწყებისგან მაშინდელმა პრემიერ-მინისტრმა ზურაბ ნოღაიდელმა და პარლამენტის თავმჯდომარემ ნინო ბურჯანაძემ შეაჩერეს.
ამის შესახებ "ჯი-ეიჩ-ენს" პარტია "სამართლიანი საქართველოს" ერთ-ერთმა ლიდერმა პეტრე მამრაძემ განუცხადა.
"ზურაბ ჟვანიას შემდეგ სწორედ ნინო ბურჯანაძე და ზურაბ ნოღაიდელი იყვნენ, რომლებიც სამხედრო ავანტურის მოწყობაზე სააკაშვილს აჩერებდნენ. მას ჯერ კიდევ 2006 და 2007 წლებში უნდოდა სამხედრო-პოლიტიკური ავანტურის მოწყობა, მაგრამ მაშინ ამ ორმა ადამიანმა შესძლო მისი შეჩერება", - აღნიშნა მამრაძემ.
მისივე თქმით, 2008 წელს მომხდარი ომის აცილება ვეღარ მოხერხდა, რადგან ბურჯანაძე და ნოღაიდელი თანამდებობებზე აღარ იმყოფებოდნენ და მათ პრეზიდენტთან უშუალო კავშირი აღარ ჰქონდათ.
"შემდეგ საიდუმლო ხელშეკრულება გააფორმა რუსებთან ანუ ოკუპანტებთან "ენგურჰესთან" დაკავშირებით, რომელიც დღემდე საიდუმლოდ რჩება. ამის შემდეგ სააკაშვილის განცხადებების შეფასებაც კი არ შეიძლება", - აღნიშნა მან "ჯი-ეიჩ-ენთან" საუბრისას.
შეგახსენებთ, რომ გუშინ საქართველოს პრეზიდენტი მიხეილ სააკაშვილი ტელეკომპანია "პირველი საინფორმაციო კავკასიურის" პროექტის "პრეზიდენტი პასუხობს ხალხს" ფარგლებში კითხვებს პირდაპირ ეთერში დაახლებით სამი საათის განმავლობაში პასუხობდა.
პრეზიდენტის შეფასებით ნოღაიდელს და ბურჯანაძეს სხვა ქვეყანაში, მტრის სამხედრო აღლუმში მონაწილეობისთვის, დახვრეტდნენ.
