პარტია "სამართლიანი საქართველოს" წევრი პეტრე მამრაძე საქართველოს პრეზიდენტის განცხადებას, ყოფილი პრემიერ-მინისტრის ზურაბ ნოღაიდელისა და პარლამენტის ექს-თავმჯდომარის ნინო ბურჯანაძის მისამართით, არაადეკვატურს უწოდებს.
როგორც "ჯი-ეიჩ-ენთან" საუბრისას ნოღაიდელის თანაგუნდელმა, პარტია "სამართლიანი საქართველოს" წევრმა პეტრე მამრაძემ აღნიშნა, სააკაშვილის არაადეკვატურ გამოსვლებზე და განცხადებებზე კომენტარის გაკეთება არ შეიძლება.
"ჩვენ ვეთანხმებით იმ ამერიკელ პოლიტოლოგებს და პუბლიცისტებს, რომლებიც დიდი ხანია წერენ, რომ საქართველოს პრეზიდენტი ყველას და ყველაფერს აბრალებს თავის წარუმატებლობას, გარდა საკუთარი არაადეკვატურობისა. ნოემბერში გამოვიდა სამეცნიერო წერილი "ქვეყნის ყველზე საშინელი მტერი", რომელშიც საუბარია იმაზე, რომ ყველზე საშინელი მტერიც კი ვარ გაუკეთებდა საქართველოს იმას, რასაც უკეთებს ქვეყანას არადეკვატური პრეზიდენტი", - აღნიშნა მამრაძემ.
შეგახსენებთ, რომ გუშინ საქართველოს პრეზიდენტი მიხეილ სააკაშვილი ტელეკომპანია "პირველი საინფორმაციო კავკასიურის" პროექტის "პრეზიდენტი პასუხობს ხალხს" კითხვებს პირდაპირ ეთერში დაახლოებით სამი საათის განმავლობაში პასუხობდა.
როგორც პრეზიდენტმა ნინო ბურჯანაძისა და ზურაბ ნოღაიდელის მიერ მოსკოვში გამართულ სამხედრო აღლუმში მონაწილეობის შეფასებისას აღნიშნა, სხვა სახელმწიფოში, მტრულად განწყობილი ქვეყნის მეთაურთან სამხედრო აღლუმში მონაწილეობისთვის ასეთ პოლიტიკურ ლიდერებს დახვრეტდნენ.
"ერთ-ერთმა ჩემმა მეგობარმა სახელმწიფოს ლიდერმა მითხრა: რომელიმე ჩვენს ლიდერს ჩვენი მტერი სახელმწიფოს მეთაურთან ერთად სამხედრო "პარადში" რომ მიეღო მონაწილეობა, თავს მოვაჭრიდი და საკუთარი ხელით დავხვრეტდიო. საქართველოში ამას აკეთებენ დიდი ხანია, მაგრამ ვინმემ მათ ერთი ღერი თმა ჩამოუგდო? ვინმემ კვერცხი მაინც დაუშინა?" - აღნიშნა სააკაშვილმა და დასძინა, რომ ქვეყანაში სიტყვისა და გამოხატვის თავისუფლება არსებობს.
