საქართველოს პრეზიდენტმა მიხეილ სააკაშვილმა გუშინდელი გამოსვლით კიდევ ერთხელ დაადასტურა, რომ პრობლემატურ საკითხზე პასუხი არ გააჩნია.
ამის შესახებ "ჯი-ეიჩ-ენთან" საუბრისას პარტია "ჩვენი საქართველო-თავისუფალი დემოკრატების" ერთ-ერთმა ლიდერმა ალექსი პეტრიაშვილმა გუშინ პრეზიდენტ სააკაშვილის "პრეზიდენტის პასუხობს ხალხს" პროექტის ფარგლებში გამოსვლის შეფასებისას აღნიშნა.
"ეს იყო ერთ-ერთი მისი ყველაზე წარუმატებელი პროექტი, რადგან სააკაშვილმა თავისი გამოსვლით დადასტურა, რომ მას და მის ხელისუფლებას არც ერთ პრობლემატურ საკითხზე, რომელიც დღეს ჩვენი საზოგადოების და ქვეყნის წინაშე დგას, პასუხი არ გააჩნია. იქნება ეს ეკონომიკური, სოციალური თუ პოლიტიკური საკითხები. მან ცალსახად დაადასტურა, რომ ვეღარ ფლობს ბერკეტებს და არ აქვს გეგმა, როგორ შეიძლება შემცირდეს ქვეყანაში ინფლაცია, უმუშევრობა. ასევე არანაირი გეგმა არ აქვს ქვეყნის ტერიტორიული მთლიანობის პრობლემის მოგვარებასთან დაკავშირებით", - აღნიშნა პეტრიაშვილმა.
მისივე შეფასებით, როგორი უნდა იყოს ქართული ოპოზიცია და ვინ უნდა მოვიდეს ქვეყნის სათავეში, მიხეილ სააკაშვილის გადასაწყვეტი არ არის და ეს არჩევანი ქართველმა ხალხმა თავად უნდა გააკეთოს.
"სააკაშვილს ერთადერთი, რაც დარჩენია, არის ის, რომ მოამზადოს და ხელის შეუწყოს ისეთი საარჩევნო გარემოს შექმნას, რომელიც მოსახლეობას საშუალებას მისცემს თავისუფალი და დემოკრატიული არჩევანი გააკეთოს, რათა ხელისუფლება შეიცვალოს, რომელსაც ქვეყნის, როგორც ეკონომიკური კრიზისიდან, ასევე პოლიტიკური და უსაფრთხოების მოგვარების კუთხით არანაირი გეგმა არ აქვს", - დასძინა "ჯი-ეიჩ-ენთან" საუბრისას პეტრიაშვილმა.
რაც შეეხება პრეზიდენტ სააკაშვილის მიერ დევნილების და ვეტერანების საკითხების შეფასებას, "თავისუფალ დემოკრატებს" მიაჩნიათ, რომ ქვეყნის პირველი პირის მიერ გაკეთებული განცხადებები ამ ადამიანების მიმართ გამოხატული კიდევ ერთი ცინიზმი იყო.
"ეს იყო ცინიზმი. მაშინ, როდესაც სააკაშვილი ცდილობს დაგვარწმუნოს, რომ ყოველ დილას იღვიძებს გაბრაზებული, განაწყენებული და დევნილების მას ყველაზე კარგად ესმის, ამ დროს მათ ზამთრის ყველაზე ცივ დღეებში ისეთი ფორმებით ასახლებენ, რომ ფაშიზმზე გადაღებულ ფილმებს მოგაგონებს. ის, თუ ასეთი გულშემატკივარი იყო დევნილების, მაშინ ჯერ ადგილზე სოციალური პრობლემები და ვითარება უნდა მოეგვარებინა, სადაც ამ ხალხს განასახლებდა და არა გადაასახლებდა", - განაცხადა პეტრიაშვილმა.
რაც შეეხება ვეტერანებს, პეტრიაშვილი პრეზიდენტ სააკაშვილს ურჩევს, რომ იმ ქვეყნებში სადაც ვიზიტებით დადის არა მხოლოდ სიმბოლოების პატივისცემის საკითხი, ასევე ისიც შეისწავლოს როგორ ექცევიან ომის ვეტერანებს.
"სააკაშვილი, როდესაც საუბრობს სიმბოლოების პატივისცემაზე, ამ დროს ვერ ბედავს ისაუბროს ვეტერანებზე, რომლებიც ჩვენი ქვეყნის მთლიანობისა და თავისუფლების სიმბოლები არიან. მან ესეც და ისიც კარგად იცის თუ როგორ ეპყრობიან სხვა ქვეყნებში ომის ვეტერანებს", - აღნიშნა "თავისუფალი დემოკრატების" ერთ-ერთმა ლიდერმა.
შეგახსენებთ, რომ გუშინ საქართველოს პრეზიდენტი მიხეილ სააკაშვილი ტელეკომპანია "პირველი საინფორმაციო კავკასიურის" პროექტის "პრეზიდენტი პასუხობს ხალხს" კითხვებს პირდაპირ ეთერში დაახლებით სამი საათის განმავლობაში პასუხობდა.
