ნატო-ს გენერალურმა მდივანმა მარკ რუტემ განაცხადა, რომ შეერთებულ შტატებს უფლება აქვს ყურადღების ფოკუსიევროპიდან და რუსეთიდან ჩინეთში გადაიტანოს.
მარკ რუტემ უპასუხა ჟურნალისტების შეკითხვას The Washington Post-ის ბოლო პუბლიკაციასთან დაკავშირებით, რომლის მიხედვითაც პენტაგონის სტრატეგია ითვალისწინებს მხოლოდ ჩინეთთან კონფლიქტს, ხოლო რუსეთის მხრიდან საფრთხე ძირითადად ევროპელი მოკავშირეების საქმე იქნება.
გენერალურმა მდივანმა ფაქტობრივად, მხარი დაუჭირა ამერიკულ მიდგომას და განაცხადა, რომ მნიშვნელოვანია ალიანსის წევრებმა აღიარონ არა მხოლოდ რუსული საფრთხის არსებობა.
„ჩვენ ყველაფერი უნდა გავაკეთოთ იმისათვის, რომ დავიცვათ ევროატლანტიკური სივრცე, მათ შორის საფრთხეებისგან, რომლებიც მოდის ევროატლანტიკური სივრცის გარედან.
და ეს ეხება როგორც შეერთებულ შტატებს, ასევე სხვა მოკავშირეებს. „ამიტომ ჩვენთვის მნიშვნელოვანია ის, რაც ხდება ინდო-წყნარი ოკეანის რეგიონში.
ეს გასაგებია აშშ-სთვის, ამიტომ ბუნებრივია, რომ მათ სურთ უფრო და უფრო მეტი კონცენტრირება მოახდინონ მსოფლიოს ამ ნაწილზე.
და ამიტომ სავსებით ლოგიკურია, რომ ევროპელებს უნდა ჰქონდეთ უფრო დიდი როლი [ევროპის დაცვაში],- თქვა გენერალურმა მდივანმა და გამოთქვა რწმენა, რომ მსოფლიოში სტაბილურობის შენარჩუნება ყველა მოკავშირის საერთო ინტერესშია.
„ჩვენ ყველა, აშშ-სთან ერთად ვაცნობიერებთ, რომ საფრთხეები მხოლოდ რუსეთს არ უკავშირდება. ჩინეთი ძლიერდება. ჩვენ ვხედავთ, რა ხდება ირანში, ჩრდილოეთ კორეაში“, - დასძინა მან.
