ცირკში სიარულის ასაკიდან დიდი ხანია გამოვედი, არანაირი კომისია არ არსებობს საპარლამენტო, ისევე როგორც არ არსებობს არანაირი პარლამენტი, - ამის შესახებ თავდაცვის ყოფილმა მინისტრმა, ირაკლი ოქრუაშვილმა საქალაქო სასამართლოში, მაგისტრი მოსამართლის თანდასწრებით გამოკითხვის დასრულების შემდეგ განაცხადა.
როგორც ის ამბობს, რომ “ე.წ. კომისიაში მონაწილეობის ვალდებულება არ ჰქონია, რადგან შესაბამისი გადაწყვეტილება არ ჩაბარებია“.
"თავი საბავშვო ბაღში მეგონა, რას სიტყვებით მოვიხსენიე მაგალითად მიხეილ ქარელი სოციალურ ქსელში, მეკუთვნის თუ არა კონკრეტული გვერდი სოციალურ ქსელში კონკრეტულად მე. რა პოსტები მქონდა გამოქვეყნებული ბოლო პერიოდში კომისიასთან დაკავშირებით და ანალოგიური არასერიოზული კითხვები. არანაირი ვალდებულება ე.წ. კომისიაში მონაწილეობის არ მქონია, რადგან არ ჩამბარებია შესაბამისი წესით, კომისიის გადაწყვეტილება ჩემს დაბარებაზე, გადაწყვეტილება და არა წერილი. წულუკიანის წერილი კი გადაწყვეტილებას არ ნიშნავს, - განაცხადა ოქრუაშვილმა.
პროკურატურამ გამოძიება 349-ე მუხლით დაიწყო, რაც საგამოძიებო კომისიის კანონიერი მოთხოვნის დაუმორჩილებლობას გულისხმობს. პროკურატურამ გამოძიება ოქრუაშვილის წინააღმდეგ პარლამენტის საგამოძიებო კომისიის თავმჯდომარის, თეა წულუკიანის მიმართვის საფუძველზე დაიწყო. ოქრუაშვილმა საგამოძიებო კომისიის სხდომაზე გამოცხადებაზე უარი თქვა.
