შინაგან საქმეთა სამინისტროს საგანგებო სიტუაციების მართვის სამსახურმა, სამოქალაქო უსაფრთხოების შესახებ, მოზარდთა ცნობიერების ამაღლების მიზნით, გარდაბნის მუნიციპალიტეტის სხვადასხვა საჯარო სკოლაში, თეორიული და პრაქტიკული სწავლება ჩაატარა.
უწყების ცნობით, თეორიული სწავლების ფორმატში, სამოქალაქო უსაფრთხოების თანამშრომლებმა, სკოლის მასწავლებლებსა და მოსწავლეებს საგანგებო სიტუაციების დროს ქცევის წესების შესახებ დეტალური ინფორმაცია მიაწოდეს. პრაქტიკული სწავლების ფარგლებში, კი სკოლის ტერიტორიაზე საგანგებო სიტუაციის სიმულაცია მოეწყო. მეხანძრე-მაშველებმა ურბანული ხანძრის დროს მოქმედების ყველა აუცილებელი კომპონენტის დემონსტრირება და მოქალაქეების შენობიდან ევაკუაცია განახორციელეს.
სწავლების დასასრულს, მასწავლებლებსა და მოსწავლეებს ქართულ-აზერბაიჯანულ ენაზე შედგენილი საგანგებო სიტუაციების დროს ქცევის წესების ინსტრუქცია გადაეცათ.
როგორც უწყებაში აღნიშნავენ, აღნიშნული ღონისძიება, საქართველო-აზერბაიჯანის ერთობლივი პროექტის „ტრანსსასაზღვრო რისკების შეფასება და სამოქმედო გეგმის შემუშავება საქართველოსა და აზერბაიჯანში - SAILOR“ ფარგლებში განხორციელდა.
