ტელეკომპანია "პირველი საინფორმაციო კავკასიურის" პირდაპირ ეთერში სტუმრად მყოფი მიხეილ სააკაშვილი ომის ვეტერანების დარბევის საკითხსაც შეეხო. მისი აზრით, ყველა ვეტერანს აქვს პროტესტის გამოთქმისა და სოციალური პრივილეგიების მოთხოვნის უფლება. თუმცა პრეზიდენტი მიიჩნევს, რომ სამშობლოსგან რაღაცას კი არ უნდა ითხოვდე, არამედ სამშობლოს დაცვა უნდ იყოს ყველა ადამიანის პრივილეგია.
სააკაშვილი აცხადებს, რომ სახელმწიფომ ამ ადამიანებისთვის, შესაძლებლობის ფარგლებში, ყველაფერი გააკეთა. არმიაში ჩვენი ოფიცრების საშუალო ხელფასი 1000 ლარია, ჯარისკაცის საშუალო ხელფასი კი 800 ლარამდეა, ყველა დაღუპულის ოჯახმა მიიღო ბინა, ყველა მათგანის ოჯახის წევრი თითქმის დასაქმებულია და იღებს პენსიას.
პრეზიდენტი შეახსენებს საზოგადოებას, რომ საკრებულოს თავმჯდომარეობისას სწორედ მისი ინიციატივით შეიქმნა მონუმენტი თბილისის ცენტრში, სადაც დაღუპულთა ახლობლები მიდიან.
"აქ დგას ორი ჯარისკაცი, მსოფლიოს ყველა ქვეყანაში ეს არის უწმინდესი ადგილი, არის მარადიული ცეცხლი. ამ დროს კი იქ მივიდა ექვსი კაცი, დააფარეს საქართველოს ძველი დროშა, ამ ორ ჯარისკაცს ჩაუდგეს თავისი საწოლები, გამოფინეს საცვალი, მოშარდეს მარადიული ცეცხლის გვერდზე. ასეთ დროს პოლიციის გამოყენება თურმე არის პოლიტიკური ჩარევა", _ აცხადებს პრეზიდენტი.
მისი თქმით, ეროვნული სიმბოლოების პატივისცემა მარტო მთავრობის პრივილეგია არ არის, ესაა განსაკუთრებული ნიჭი, რაც თითოეულ ადამიანს უნდა ჰქონდეს.
"აფერუმ, იმ ჯარისკაცების გამძლეობას, ვინც იქ იდგნენ და 6 დღის განმავლობაში ამას იტანდნენ. მათ უფროსს ისიც არ მოაფიქრდა, ჯარისკაცი მოეშორებინა იქიდან. თუ თქვენ ჭეშმარიტ დემოკრატიას ეძახით მოშარდვას მთავარ ეროვნულ სიმბოლოზე, ასეთი დემოკრატია, სანამ პრეზიდენტი ვარ, არ იქნება. დემოკრატია პასუხისმგებლობაა", _ მიიჩნევს სააკაშვილი.
