ეს იქნება პოლიტიკური დევნის და პატიმრობის ყველაზე ქოცური შემთხვევა პუტინის სტილში, - ამის შესახებ პარტია ლელოს გენერალური მდივანი ირაკლი კუპრაძე პარლამენტის საგამოძიებო კომისიის გადწყვეტილებაზე სოციალურ ქსელში წერს.
„მამუკა ხაზარაძის საგამოძიებო კომისიაზე გამოუცხადებლობის გამო, არალეგიტიმურმა პარლამენტმა საქმე პროკურატურას გადასცა და პოლიტიკური განცხადებებით პატიმრობას ითხოვს!
ეს იქნება პოლიტიკური დევნის და პატიმრობის ყველაზე ქოცური შემთხვევა პუტინის სტილში!
შიში არ არსებობს, როცა საქმე პრინციპებს და ქვეყნის მომავალს ეხება!“ - წერს ირაკლი კუპრაძე.
საქართველოს პარლამენტში „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებით საგამოძიებო კომისიის“ სხდომაზე გამოუცხადებლობის გამო, მამუკა ხაზარაძის საქმე პროკურატურაში გადაიგზავნება. ამის შესახებ გადაწყვეტილება საპარლამენტო კომისიის დღევანდელ სხდომაზე მიიღეს.
მანამდე „ლელო საქართველოსთვის“ ლიდერმა, მამუკა ხაზარაძემ სოციალურ ქსელში დაწერა: „დღეს არალეგიტიმური პარლამენტის საგამოძიებო კომისიაში მელოდებიან, მისვლას და ამ ცირკში მონაწილეობას არ ვაპირებ“.
