SpaceX-ის დამფუძნებელმა და აშშ-ის მთავრობის ეფექტიანობის დეპარტამენტის ხელმძღვანელმა ილონ მასკმა განაცხადა, რომ ის არასოდეს გამორთავს Starlink-ის ტერმინალებს უკრაინაში.
მან ხაზგასმით აღნიშნა, რომ Starlink არასოდეს იქნება გამოყენებული, როგორც ვაჭრობის ინსტრუმენტი.
„აბსოლუტურად მკაფიო რომ ვიყო: იმისგან დამოუკიდებლად, ვეთანხმები თუ არა მათ პოლიტიკას, Starlink-ის ტერმინალები უკრაინაში არასოდეს გამოირთვება, ეს გამორიცხულია.
მე უბრალოდ ვახდებ ფაქტის კონსტატაციას: Starlink-ის გარეშე უკრაინის ფრონტის ხაზი დაინგრევა, რადგან რუსებს შეუძლიათ კომუნიკაციის ყველა სხვა საშუალება ჩაკეტონ!
ჩვენ ამას არასოდეს გავაკეთებთ და არასოდეს გამოვიყენებთ მას, როგორც ვაჭრობის საშუალებას“, - წერს მასკი.
შეგახსენებთ, პოლონეთის საგარეო საქმეთა მინისტრი რადოსლავ სიკორსკი გამოეხმაურა მილიარდერ ილონ მასკის განცხადებას. სიკორსკის თქმით: „უკრაინისთვის Starlink-ებს პოლონეთის გაციფრულების სამინისტრო აფინანსებს, რაც წელიწადში დაახლოებით 50 მილიონი დოლარი ჯდება.
აგრესიის მსხვერპლის მუქარის ეთიკური მხარე გვერდზე რომ გადავდოთ, თუ SpaceX არასანდო მომწოდებლად იქცევა, მოგვიწევს ალტერნატიული მომწოდებლების ძიება“.
აშშ-ის სახელმწიფო მდივანმა მარკო რუბიომ, პოლონეთის საგარეო საქმეთა მინისტრის რადოსლავ სიკორსკის განცხადების საპასუხოდ, განაცხადა, რომ „არავინ დამუქრებია უკრაინას Starlink-ის გათიშვით“.
მანამდე კი მასკმა დაწერა: „Starlink-ის სისტემა უკრაინის არმიის ხერხემალია და თუ ის მას გამორთავს, უკრაინის შეიარაღებული ძალების ფრონტის ხაზი დაინგრევა“.
