პრეზიდენტ მიხეილ სააკაშვილთან შეკითხვები "თავისუფალ დემოკრატებსაც" აქვს, თუმცა ირაკლი ალასანიას მოძრაობა მათ საჯაროდ აქვეყნებს და ქვეყნის პირველ პირს ცხელი ხაზისა და ელექტრონული მისამართის საშუალებით არ უგზავნის.
პრეზიდენტისადმი განკუთვნილი შესაბამისი ნუსხა სულ 5 შეკითხვას მოიცავს და თითოეული მათგანი სხვადასხვა თემატიკას ეხება.
"1. რატომ იზრდება თქვენი მმართველობის დროს საქართველოში სიღარიბის ზღვარზე ან მის მიღმა მყოფ ადამიანთა რიცხვი, რომელმაც უკვე 1 800 000-ს მიაღწია? როდის გაიზრდება პენსიები ისე, რომ ის შესაბამისობაში მოვიდეს საარსებო მინიმუმთან ან თუნდაც ინფლაციის პროცესთან, რომ არაფერი ვთქვათ უკვე საყოველთაოდ ცნობილ ასდოლარიან პენსიებზე? 2. როდის აუხსნით საკუთარ მოქალაქეებს, რომელთა წინაშეც ხართ ანგარიშვალდებული, რაში იხარჯება სარეზერვო ფონდები? 3. იცის თუ არა, რომ საქართველოში უამრავი უკანონო პატიმარია და როდის დაინტერესდებით პერსონალურად ის იმ უკანონო პატიმრების მდგომარეობით, როგორიცაა, მაგალითად, გვანცა ყუფარაძე, გიორგი ალიმონაკი, და სხვა.? 4. როდის დააფასებს ხელისუფლება სამშობლოსათვის თავდადებულ ვეტერანებს? რა არ მოგეწონათ, როდესაც გმირთა მოედანზე ჩაიარეთ და ვეტერანთა კანონიერი აქცია დაინახეთ? ეკადრება თუ არა მთავარსარდალს, გასცეს ბრძანება კანონიერი პროტესტის გამომხატველი საკუთარი ჯარისკაცის დარბევის შესახებ? 5. ვინ აგებს პასუხს დევნილთა დევნაზე და მათ გამოსახლებაზე კანონისა და ევროპული სასამართლოს მითითებების დარღვევით? მიგაჩნიათ თუ არა ბუნებრივად, რომ დევნილთა დიდი ნაწილი შიმშილსა და გაჭირვებას განიცდის და დევნილთა სამინისტროს სარდაფში, ახლახანს გადაღებული ფოტოების მიხედვით, იქ ტონობით ვადაგასული ჰუმანიტარული დახმარება ინახება?", - ეს არის ის შეკითხვები, რაზეც პასუხებს ირაკლი ალასანიას გუნდი ქვეყნის პირველი პირისგან დღეს ელოდება.
შეგახსენებთ, რომ მიხეილ სააკაშვილი დღეს, 18:00 საათზე, მოსახლეობის შეკითხვებს უპასუხებს.