თანაინვესტირების ფონდის ყოფილი ხელმძღვანელის გიორგი ბაჩიაშვილის ადვოკატმა, დავით ჯანდიერმა "ტვ პირველის" პირდაპირ ეთერში განაცხადა, რომ ის ბაჩიაშვილს უკვე ესაუბრა. მისი თქმით, ბაჩიაშვილი ამჟამად უსაფრთხოდ არის.
მისივე თქმით, ბაჩიაშვილს ჰქონდა კონკრეტული ინფორმაცია მის უსაფრთოებასთან დაკავშირებით და ისიც იცოდა, რომ მისი უსაფრთოება სასჯელაღსრულების დაწესებულებაში დაცული არ იქნებოდა.
„სასამართლოში მიმდინარე მთელი ეს პროცედურა ადასტურებს, რომ გიორგი ბაჩიაშვილის მიმართ ხორციელდებოდა და ხორციელდება ადამიანის უფლებათა ევროპული კონვენციით გათვალსიწინებული მთელი რიგი უფლებების დარღვევა. ამ უფლებების დარღვევის შესახებ უფრო დეტალური ინფორმაცია საზოგადოებას მიეწოდება მას შემდეგ, რაც რაც ეს პროცესები დასრულდება. ფაქტობრივად 10-11 რიცხვში ჩვენ ველოდებით განაჩენის გამოტანას. ის, რაზეც საუბრობს გიორგი ბაჩიაშვილი არის და იყო მთელი ამ პროცედურის განმავლობაში ძალიან ყურადსაღები და რაც უკავშირდება მის პირად უსაფრთოებას, მას ჰქონდა ასეთი კონკრეტული ინფორმაცია. მე მას ვესაუბრე, შემიძლია ვთქვა, რომ ის ამჟამად არის უსაფრთხოდ, მე სხვა ინფორმაციის საზოგადოებისთვის მიწოდების შესაძლებლობა არ მაქვს", - განაცხადა ჯანდიერმა.
შეგახსენებთ, თანაინვესტირების ფონდის ყოფილმა გენერალურმა დირექტორმა გიორგი ბაჩიაშვილმა სოციალურ ქსელში დაწერა, რომ საქართველო დატოვა.
