23 თებერვალს გერმანიის მოქალაქეები ახალ ბუნდესთაგს აირჩევენ
კვირას, 23 თებერვალს გერმანიაში ვადამდელი საპარლამენტო არჩევნები გაიმართება. დაახლოებით 59,2 მილიონ მოქალაქეს აქვს უფლება, აირჩიოს ბუნდესთაგის მაქსიმუმ 630 წევრი.
ამომრჩევლები ერთი ხმით ოლქებში მაჟორიტარ კანდიდატებს აირჩევენ, ხოლო მეორე ხმით პარტიებს. ბუნდესთაგში მოხვდებიან მხოლოდ ის პარტიები, რომლებიც 5%-იან ბარიერს გადალახავენ მთელი ქვეყნის მასშტაბით ან მოიპოვებენ სამზე მეტ პირდაპირ მანდატს.
ვადამდელი არჩევნების ჩატარება მას შემდეგ გახდა აუცილებელი, რაც გერმანიის სამთავრობო კოალიცია სოციალ-დემოკრატიული პარტიის, თავისუფალი დემოკრატებისა და მწვანეების შემადგენლობით და კანცლერ ოლაფ შოლცის მეთაურობით, დაიშალა 2024 წლის 6 ნოემბერს.
გამოკითხვების თანახმად, კანცლერობის ყველაზე მაღალი შანსი ქრისტიან-დემოკრატიული კავშირის (CDU) ლიდერს ფრიდრიხ მერცს აქვს. იგი არის ქრისტიან-დემოკრატიული კავშირისა და ბავარიის ქრისტიან-სოციალური კავშირის (CSU) ბლოკის კანცლერობის კანდიდატი. ბლოკი 2021 წლიდან ბუნდესთაგის წამყვანი ოპოზიციური ძალაა. მანამდე ბლოკი 16 წლის განმავლობაში მართავდა გერმანიას და ახლა კვლავ სურს მართვის სადავეების აღება.
ვარაუდობენ, რომ CDU/CSU-ს ბლოკი ვადამდელ არჩევნებზე ხმების დაახლოებით 30%-ს აიღებს. დიდი ალბათობით, მეორე ადგილზე ულტრამემარჯვენა პარტია "ალტერნატივა გერმანიისთვის" (AFD) გავა, რომელიც დაახლოებით ხმების 20%-ს აიღებს. ეს იქნება ორჯერ მეტი, ვიდრე პარტიამ მიიღო ბოლო არჩევნებში.
კანცლერ ოლაფ შოლცის სოციალ-დემოკრატიული პარტია (SPD) სავარაუდოდ 16%-ს მიიღებს.
გერმანიის ბუნდესთაგმა კანცლერ ოლაფ შოლცის მთავრობას უნდობლობა 16 დეკემბერს გამოუცხადა.
მთავრობისადმი ნდობის გამოცხადების საკითხის დაყენება ბუნდესტაგის წინაშე თავად კანცლერმა ოლაფ შოლცმა მოითხოვა მას შემდეგ, რაც მმართველი კოალიცია დაიშალა. თავის მხრივ, მმართველი კოალიციის დაშლა შოლცის მიერ ფინანსთა მინისტრ კრისტიან ლინდერნის გათავისუფლებამ განაპირობა. ლინდერნი კოლიციაში შემავალი თავისუფალი დემოკრატიული პარტიის ლიდერია.
გერმანიის ფედერალური საარჩევნო კომისიის მიერ ოფიციალურად აღიარებული 41 პარტიიდან, 29 მიიღებს მონაწილეობას ბუნდესთაგის მომავალ არჩევნებში.
