რუსეთის ომი ჩვენი დაყოფისკენ იყო მიმართული, მაგრამ მან საპირისპირო შედეგი გამოიღო: ჩვენ ვიქნებით ერთიანები უკრაინის მხარდასაჭერად და ევროპის დასაცავად, - ამის შესახებ ევროკომისიის პრეზიდენტმა ურსულა ფონ დერ ლაიენმა „მსურველთა კოალიციის“ შეხვედრის შემდეგ განაცხადა.
„დღეს შუადღისას ჩვენ გვქონდა მსურველთა კოალიციის შეხვედრა. მე პრეზიდენტ ზელენსკის და დამსწრე ლიდერებს ორი ძირითადი პრიორიტეტის შესახებ მივაწოდე ინფორმაცია: უკრაინის მხარდაჭერისა და ევროპის თავდაცვის მზადყოფნის გაძლიერების შესახებ. ყველამ ვიცით, რა დევს სასწორზე და ვიცით, რომ დროის დაკარგვის უფლება არ გვაქვს. ფინანსური მხარდაჭერის გაწევა ხელს შეუწყობს უკრაინის გადარჩენას და ეს ევროპული თავდაცვის გადამწყვეტი აქტია“, - განაცხადა ფონ დერ ლაიენმა.
ფონ დერ ლაიენმა გამოთქვა რწმენა, რომ „ამ ახალ ეპოქაში გეოეკონომიკა გეოპოლიტიკუს მხარდამხარ მიდის“.
„ჩვენ ვაცნობიერებთ ჩვენი სანქციების დრამატულ გავლენას რუსეთის სამხედრო ეკონომიკაზე. ჩვენს მოკავშირეებთან ერთად, ევროპას აქვს საშუალებები და ნება, გააძლიეროს ზეწოლა რუსეთზე, რათა ის მოლაპარაკებების მაგიდასთან დაჯდეს“, - განაცხადა ევროკომისიის პრეზიდენტმა.
ამავდროულად, მან აღნიშნა, რომ ევროკომისიის წინადადება რეპარაციების სესხის შესახებ რთულია, მაგრამ არსებითად ის ზრდის ომის ფასს რუსეთისთვის.
„გეგმა, რომ გაყინული რუსული აქტივები უკრაინას რეპარაციული სესხის სახით გადაეცეს, კომპლექსურია, მაგრამ რაც უფრო დიდხანს გააგრძელებს პუტინი ომს, სისხლისღვრას, მკვლელობას და უკრაინის ინფრასტრუქტურის განადგურებას, მით უფრო მაღალი იქნება ფასი რუსეთისთვის“, – თქვა ფონ დერ ლაიენმა
ფონ დერ ლაიენის თქმით, მაშინ, როდესაც უკრაინა მშვიდობის მისაღწევად ნამდვილ დიპლომატიურ ძალისხმევას მიმართავს, რუსეთი მუდმივად იტყუება და დრო გაჰყავს. დასცინის დიპლომატიას და აძლიერებს დარტყმებს, ამავდროულად კი თითქოს მშვიდობისკენ ისწრაფვის“.
„დღეს ეს ფასადი უცვლელი რჩება. თუმცა, ჩვენ მას არ დავნებდებით; ჩვენ ვიცით, ვინ არის აგრესორი და ვინ - მსხვერპლი ამ ომში. რუსეთის სასტიკი ომი ჩვენი დაყოფისკენ იყო მიმართული, მაგრამ მან საპირისპირო შედეგი გამოიღო. ჩვენი კავშირები უფრო ძლიერია, ვიდრე ოდესმე. ჩვენ გვაერთიანებს არა მხოლოდ თავდაცვის ინტერესები, არამედ საერთო ღირებულებებიც. და ზუსტად ასე ვიმოქმედებთ, გაერთიანებულები უკრაინისა და ევროპის დაცვის მხარდასაჭერად“, - განაცხადა ევროკომისიის პრეზიდენტმა.
